Hávísindalegar spekúleringar!

Námið búið, er á heimleið

2009-09-11T10:13:00.003Z

Nú er mastersnáminu mínu, sem ég lagði upp í fyrir réttu ári síðan, lokið. Formeg útskrift verður í lok nóvember en allt sem viðkemur náminu sjálfu er búið - "over and done!" Ég er mjög ánægð með viðbrögðin við ritgerðinni og veggspjaldinu mínu, sem var hluti af nokkurs konar vörn og bíð spennt eftir einkunninni.

Ég hef ekki náð að fagna námslokunum því mér líður svo undarlega þessa dagana. Ég held að óvissan um hvað framundan er sé að spila þar inní. En ég er á heimleið, allavega í bili á meðan ég held áfram að leita að atvinnu og kem líklega til Íslands í næstu viku. Það sem þá tekur við er að losa búslóðina mína úr geymslunni, henda meiru og reyna að gefa sem mest. Svo liggur leiðin heim á Ísafjörð og lengra nær planið ekki ....

Bestu kveðjur frá Edinborg - ætli næsta færsla verði ekki frá Íslandi...?

Jæja og hvað svo?

2009-08-23T10:20:00.002Z

Jæja, ég er búin að skila mastersritgerðinni og er bara nokkuð ánægð með verkið. Þá á ég bara eftir svokallaða "poster-presentation" sem er nokkurs konar vörn. Þar set ég upp á veggspjald megin atriðin úr ritgerðinni og svo koma einhverjir prófdómarar og þarf ég að geta svarað spurningum um efnið. Þetta verður þann 8.september og ætti ég að fá einkunn fyrir lokaverkefnið fljótlega þar á eftir.
En í dag byrja ég að pakka niður dótinu mínu því ég er að flytja úr íbúðinni sem ég hef verið í hérna síðsta árið. Þar sem ég veit enn ekkert hvað tekur við, þá fæ ég að vera í herbergi heima hjá Judy og Goff, leigusölunum mínum, allavega fram yfir poster-presentation. Mér sýnist á öllu að ég fari svo að huga að því að koma mér heim til Íslands en hvað tekur svo við er alveg óráðið.
Ég er að senda umsóknir um atvinnu út um allt svo hlutirnir geta breyst með litlum fyrirvara. Nú, ef ekkert jákvætt kemur út úr neinum af þessum umsóknum þá er stefnan að vera á Ísafirði í vetur og njóta fjölskyldunnar :)

Bless í bili, set hérna inn ef eitthvað breytist.....

Segir fátt af einum

2009-07-13T12:55:00.002Z

Héðan er ekki mikið að frétta þessa dagana enda segir fátt af einum :)

Ritgerðin gengur ágætlega, er byrjuð að hnoða saman einhverjum skrifum eftir að hafa verið í útreikningum og heimildaröflun síðasta mánuðinn.

Ég hef verið að kynna mér þennan frumskóg sem atvinnuleit er. Þetta er algerlega nýr heimur fyrir mér. Ég gerði mér ekki grein fyrir að það væru svona mörg atriði sem maður þyrfti að hafa í huga við að sækja um atvinnu. Í fyrsta lagi þá getur það skipt sköpum að ferilskráin sé 100% rétt sett upp, þ.e. að réttu atriðin séu talin upp fyrst o.s. frv. Svo er það fylgibréf (e. cover letter) sem þarf helst að vera nokkurn vegin sérsmíðað fyrir hverja umsókn og svona mætti telja áfram.
Ég hef fengið góð ráð frá fólki hérna sem hefur verið að ganga í gegnum það sama og einnig frá professional aðilum í gegnum netið svo nú er bara að halda áfram að leita og sækja um. Ég hef nú þegar sótt um 5-6 stöður hérna í Bretlandi og fengið tvö neikvæð svör til baka og svo er ég búin að sækja um 3 stöður í Noregi sem ég hef ekkert heyrt um ennþá.
Ég þarf svo að gefa mér tíma núna í vikunni til að leita víðar en málið er einmitt að þetta er svo svakalega tímafrekt, það var eitt af því sem kom mér líka á óvart. En jæja, þetta er bara enn ein reynslan í sarpinn, svo lengi lærir sem lifir - ekki satt?!!

En á meðan allt er í óvissu með hvað tekur við eftir að ágústmánuður verður liðinn, þá er Edinborgin mín alltaf jafn notaleg og ég nýt sumarsins hérna til fulls.

Bestu kveðjur til allra sem líta hérna við (mynni á commentin!)

Góðir dagar

2009-06-28T10:48:00.002Z

Ólöf er komin og farin. Við áttum saman skemmtilega daga, skoðuðum sögulega staði í borginni og slatta af búðum :) Það var sól og 20-30 stiga hiti þessa daga sem hún stoppaði og ég held að hún hafi ekki átt von á svoleiðis veðri í Skotlandi enda landið þekkt fyrir flest annað en sólstrandaveður. Góður tími saman og margt spjallað og spekúlerað!

Núna verð ég að halda vel á spöðunum í verkefninu ef ég á að ná að klára það á réttum tíma og skila af mér góðri ritgerð.

Góðar kveðjur til allra....

Óvissa og tilhlökkun

2009-06-20T10:50:00.002Z

Síðan í desember 1989, þegar hún Ólöf litla fæddist, hef ég aldrei verið svona lengi í burtu frá henni eins og núna þetta síðasta ár. Það er búið að vera skrítið á köflum þar sem hún hefur verið á tímamótum í sínu lífi, að byrja í háskóla og að byrja að búa. En vegna þess hve hún er ótrúlega dugleg og mikill forkur þá hef ég verið róleg hérna úti, því henni gengur svo vel og er svo úrræðagóð að leysa þau vandamál sem upp hafa komið. Samt finnst mér stundum að ég sé ekki nógu góð mamma að vera ekki til staðar fyrir hana til að hjálpa til þegar þess hefur þurft. Þessi elska berst alltaf áfram og ef vinnan minnkaði á einum staðnum þá fann hún sér aðra vinnu til að bæta það upp - og það á meðan hún var að standa sig með miklum sóma í háskólanum!!!
En á morgun, sunnudag, kemur hún hingað til Edinborgar og ætlar að stoppa hjá mér í 4 daga - JIBBÍÍÍÍ!!! Ég hlakka svo til að knúsa hana og að sýna henni hvernig við Hildur höfum búið síðasta árið og ekki síst að sitja með henni og spjalla um lífið og tilveruna.
Eins og ég er mikill barnakelling og naut þess í botn að eiga stelpurnar mínar þegar þær voru litlar, þá finnst mér svo merkilegt og skemmtilegt að fylgjast með þeim verða að fullorðnum einstaklingum með sínar skoðanir á lífinu og tilverunni :)

En að öðru og ekki eins gleðilegu efni, þá fékk ég í vikunni uppsögn á samningi mínum hjá VSI svo ég hef enga vinnu að snúa til þegar ég klára námið í lok sumars. Ég var innst inni búin að búa mig undir að þetta gæti gerst þar sem ástandið í þjóðfélaginu er þannig að ekki er mikið um framkvæmdir eins og er en samt var ákveðið sjokk að sjá þetta svart á hvítu.
Ég er að þýða ferilskrána mína yfir á ensku og nú fer ég, með aðstoð kennaranna minna hérna, að leita að vinnu í mínu fagi hvar sem er í heiminum. Nú, ef ekkert kemur út úr því þá er ekkert að gera nema að reyna að halda höfði og leita áfram þangað til einhver vinna finnst!

EN í millitíðinni þá held ég áfram að skrifa lokaritgerðina, sem gengur bara ágætlega og nýt Edinborgar í sumar.

Orðin ein í kotinu

2009-06-07T11:59:00.002Z

Jæja Hildur er farin heim til Íslands og ég er orðin ein eftir í Skotlandinu.
Við leigðum okkur bíl á föstudaginn og lögðum af stað héðan frá Edinborg niður til Manchester um morguninn, keyrðum sem minnst eftir hraðbrautunum heldur tókum aðeins minni vegi og nutum útsýninsins. Við keyrðum í gegnum The Lake District og vá hvað það er fallegt þar. Stoppuðum í mjög fallegum litlum bæ sem heitir Keswick og drukkum í okkur andrúmsloftið í þessum gamla, enska bæ.

Þegar við komum á flugvöllinn í Manchester þá fengum við að vita að það væri um tveggja tíma seinkunn á fluginu hennar Hildar sem gerði í sjálfu sér ekki mikið til fyrir hana en gerði mig pínu stressaða. Sérstaklega þar sem ég lagði af stað keyrandi til Skotlands aftur eftir að hún var komin í gegnum öryggishliðið og þegar ég var komin langleiðina heim þá var hún ekki ennþá búin að fá að vita frá hvaða hliði flugvélin færi. En jæja þetta leystist allt að lokum og Einar Marlboro beið hennar á Keflavíkurflugvelli og kom henni í rúmi sitt í Grýtubakkanum.

Það var ekkert voðalega gaman að þeysa eftir hraðbrautinni í myrkrinu hingað heim en þegar ég sá ljósin í Edinborg þá fannst mér ég vera komin heim, - já HEIM! Því hérna líður mér svo vel og ég kom eiginega sjálfri mér á óvart þegar ég fann þessa "aaahhh, heima" tilfinningu við að sjá borgina. Þessa tilfinningu fæ ég alltaf þegar ég keyri inn Skutulsfjörðinn og sé Ísafjörð en ekki þegar ég nálgast Reykjavík.

Hildur er svo að fara í Bása með skólafélögunum úr Háteigsskóla í dag og fram á þriðjudag en ég er lögst yfir vinnuna fyrir lokaverkefnið mitt.

Kveðja heim á degi sjómannanna okkar!

Hildur að standa sig vel í skólanum

2009-05-29T08:22:00.002Z

Núna er síðasti dagurinn hennar Hildar í James Gillespie's High School og það hittir þannig á að þessi önn er líka að klárast hjá þeim. Í næstu viku byrja s.s. ný önn og hefði hún færst upp á fjórða ár þá ef hún hefði haldið áfram. En í gær kom hún heim með "Report" eða umsögn sem gerði mömmuna alveg afskaplega stolta, já hreinlega að springa úr monti yfir stelpunni sinni. Ég ætla að leyfa ykkur að heyra hvað kennararnir höfðu um hana að segja og hvaða heildareinkunn hún fékk í hverju fagi. Hérna er einkunnagjöfin allt öðruvísi en heima en svona í grunninn þá er gefið frá 1-10 þar sem 1 er hæst!!!

English: 3
Hildur is doing amazingly well considering English is not her first language. Her performance in the recent Close Reading test was excellent. She has done well in group presentations.

History: 1
Hildur is an excellent student making excellent progress in history. Her written work is always detailed and complete. She has mastered in Enquiry Skills we have covered so far and she has very strong factual knowledge. Her written work is well expressed and presented. When she feels confident, she answers very well in class -well done!

Physics: 3
Hildur is improving in this subject by the day. She is finally gaining in confidence and this is having a very pleasing effect on her test scores. Her understanding of the subject is excellent, she provides excellent answers verbally, and with a little more experience I hope we can work on translating this to written answering. An excellent year this year; well done Hildur!

Art and Design: 1
Hildur continues to make excellent good progress in Art and Design. She is a quiet but keen and conscientious pupil who always works hard and strives to do well. Hildur gained a 1 for her Design Unit, producing an imaginative and well modelled Pumbaa mask, a 1/2 for expressive work produced to date-her card painted church painting was particularly successful, and a 1 for her two critical essays.

Geography: 1
I have been very impressed with Hildur's commintment to the course. She works hard and has very well laid out notes. She also has a keen grasp of the topics we study coupled with a good background knowledge and she is happy to discuss her ideas. She did very well at the recent Industry assessment, especially in terms of comprehending the questions.
I am convinced tha Hildur can continue to make good progress in Geography. As long as she maintains her lively interest in the world she lives in and remains motivated to do well then there should be few diffculties for her in ther future studies.

Svo fékk hún 3 í Stærðfræði og 3 í líffræði og voru aðal kommentin þar að hún vinnur vel í tímum en væri helst til feimin og bæði ekki nógu oft um aðstoð.

Við fórum á Pizza Hut í gærkvöldi til að halda upp á þessar flottu einkunnir og umsagnir :)

Kveðja frá ofur-stoltri mömmu...

Búin í prófum en brjálað að gera í social lífinu!

2009-05-19T19:25:00.012Z

Já ég kláraði loksins prófin á laugardaginn en núna tekur við erfið bið í heilan mánuð eftir einkunnunum. En það er nú ekki amarlegt að taka próf í svona sölum:

Til vinstri er Playfair Library sem er í Old College, er nú ekki viss hvenær það var byggt en það er allavega einhverra hundruð ára gamalt. Myndin fyrir neðan er frá McEwan Hall sem er hátíðarsalur University of Edinburgh og því miður þá sýnir þessi mynd ekki nema brot af salnum sem er með gler-hvolfþaki ásamt því að vera hringlóttur í laginu. Í báðum þessum sölum hafði verið komið fyrir fullt af eldgömlum skólaborðum og maður fann greinilega fyrir því að vera partur af sögunni í gamalli og virtri menntastofnun, - voða gaman fyrir svona "bygginganörd" eins og mig :)

En eins og segir í fyrirsögninni þá er búið að vera fullt að gera hjá okkur mæðgum í social lífinu síðan á laugardaginn, eins og ég taldi upp í síðustu færslu. Það er búið að vera svo gaman alla helgina og ekki síst í gærkvöldi þegar við héldum smá matarboð í tilefni 15 ára afmælis heimasætunnar. Svona henni til heiðurs þá eru hérna tvær myndir sem sýna hana fyrir og eftir klippingu:

Sjáið bara hvað hún er orðin fullorðin stelpan!!

próf = lítið blogg

2009-05-13T09:14:00.002Z

Bara að kasta inn kveðju hérna og þakka notaleg komment.

Ég á tvö próf eftir, annað á föstudaginn og hitt á laugardaginn. Þau eru bæði frekar erfið, finnst mér og töluvert sem ég þarf að liggja yfir námsefninu ef ég á að komast í gegnum þau.
Það heldur mér gangandi við undirbúining þessara prófa er að þetta eru síðustu prófin og svo á ég "bara" mastersritgerðina eftir, er s.s. farin að sjá fyrir endann á þessu námi. Svo er líka voða skemmtileg gulrót fyrir framan mig og það er að það er svo margt skemmtilegt planað um næstu helgi með skemmtilegu fólki. Það er planað Eurovision-partý og grill með Íslendingagrúbbu á laugardagskvöldið og svo er ætlunin að fara í Blair Drummond safari park á sunnudaginn. Á mánudaginn á hún Hildur svo afmæli og þá ætlum við að steikja íslenska lambalærið sem Dagrún færði okkur og erum búin að bjóða nágrönnunum og Sungwook skólafélaga mínum í mat.
Þannig að nú er bara að grúfa sig yfir námsefnið fyrir tvö síðustu prófin svo skemmtilegheitin geti tekið völdin!!

Kveðja frá kvíðinni og spenntri Önnu í Edinborg!

Próf framundan

2009-04-29T12:19:00.003Z

Ég er búin að skila inn "pre-dissertation" sem er stórt verkefni og undirbúningur fyrir lokaverkefnið mitt. Núna eru þrjú próf framundan hjá mér, það fyrsta næsta mánudag og hin tvö þann 15. og 16. maí. Ég þarf að læra HELLING fyrir þessi próf svo nú er um að gera að halda vel á spöðunum næstu vikurnar.

Ég er svoddan sveitaskrúfa, hef aldrei áður búið í útlöndum, svo að mér finnst hin einföldustu atriði hérna skemmtileg :) Til dæmis vorið, ohh yndislegt að sjá trén blómstra! Hef bara heyrst um svoleiðis í bíómyndum og bókum en aldrei séð það sjálf með eigin augum. Hérna eru Kirsuberjatrén bleik og hvít (er sko búin að spurjast fyrir um hvaða tré þetta eru því ekki vissi ég það!) og vá hvað það er yndislega fallegt! Set inn myndir af því bráðum.

Kveðja til allra sem kíkja hingað inn :)

Langt á milli færsla

2009-04-19T20:10:00.005Z

Það er farið að líða langt á milli færsla hérna hjá mér enda nóg að gera og ég orðin árinu eldri - takk fyrir allar afmæliskveðjurnar elskurnar !!

Við áttum yndislega páska með Dagrúnu, sýndum henni t.d. Kastalann og ýmislegt hérna í borginni og svo held ég að við höfum borðað endalaust mikið þessa daga sem hún var hjá okkur. Á páskadag eldaði Dagrún svakalega góðan kalkún fyrir okkur, ég sá um meðlætið og Hildur gerði Toblerone-ís á kókosbotni í eftirrétt. Þvílík sæla!!

Þarna eru þær stöllur komnar á kaf í matarundirbúing en þó ennþá á náttfötunum enda er það svo notalegt :)

Hérna er Hildur með eftirréttinn tilbúinn, mmmmmmm.......!

Framundan er svo mikil vinna hjá mér, á að skila stóru verkefni núna á miðvikudaginn sem ég er langt komin með og svo eru þrjú próf í maí sem ég þarf að læra töluvert mikið undir.

Hildur er komin með loforð um sumarvinnu í fjórar vikur í vinnuskólanum í Reykjavík svo það lítur út fyrir að hún fari heim í júní. Hún er líka búin að fá inni hjá þeim heiðurshjónum Elínu og Jóni í Grýtubakkanum, foreldrum Dagrúnar og það er mikill munur að eiga svona góða að. Það verður skrýtið að vera ein hérna í sumar en ég kem til með að hafa nóg að gera við að skrifa mastersritgerðina mína svo þetta verður fljótt að líða.

Að lokum mynd af íslensku og útlensku páskaeggjunum (er svo einhver hissa á holdafarinu á mér??)

Páskar framundan

2009-04-09T09:17:00.002Z

Dagrún mætti í gærkvöldi með fulla tösku af góðgæti að heiman. Hún er auðvitað mjög auðfús gestur en ekki var það verra að hún skildi færa okkur íslenskt lambakjöt, Ora baunir til að hafa með því, Nóa páskaegg og fullt af lakkrís - ég sé fram á mikla óhollustu framundan!!

Á meðan Ólöf og margir aðrir sem ég þekki eiga ljúfa páskadaga á Ísafirði þá ætlum við Hildur að sýna Dagrúnu Edinborg og eiga ljúfa daga hérna líka.

Gleðilega páska öll sömul, hvar í heiminum sem þið eruð stödd!!!

Útsölur

2009-03-29T18:16:00.002Z

Það brast skyndilega á með útsölum hérna, að vísu ekki allt á útsölu en margar af stóru búðunum eru að losa sig við vetrarvörurnar og bjóða þær á afslætti í stuttan tíma. Að fara að versla er ekki mín sterkasta hlið en það var kominn tími á að bæta við fataúrvalið hjá henni Hildi svo við rifum okkur upp eldsnemma á laugardagsmorgni og drifum okkur niður í bæ. Það var snilldar hugmynd að fara snemma því þá var ösin ekki orðin voðalega mikil. Leiðin lá beint inn í verslunina Next þar sem Hildur hefur alltaf fengið á sig buxur sem passa og það gekk líka eftir. Eftir minna en 10 mínútur vorum við komnar með nokkrar buxur inn á mátunarklefa og fann Hildur tvennar gallabuxur á sig og ég fékk líka einar. Að auki fékk hún á sig pils og bol og ég keypti eitthvað af sumarfötum á Ebbu-krílið. Alls keyptum við 11 flíkur í þessari einu búð og borguðum fyrir þær 94 pund (sem leggst út sem ca. 11.000 kr.) Ekki slæm kaup það! Að vísu lentum við í smá vandræðum þar sem kreditkortinu mínu var alltaf hafnað en eftir nokkur símtöl í þjónustuver Íslandsbanka og strætóferð heim og aftur í bæinn þá var þeim misskilningi eytt. En vá, þá var klukkan líka orðin þrjú og brjáluð ös í bænum og við Hildur erum báðar þannig að það hreinlega dregur úr okkur alla orku. Það voru því þreyttar en ánægðar mæðgur sem skiluðu sér loks heim.
Núna eru allar kennslustundir búnar hjá mér í skólanum en framundan er verkefnavinna. Þarf að skila stóru verkefni 22. apríl og svo byrja prófin í byrjun maí. Svo það er eins og venjulega á þessu heimili, nóg að gera. Ég ætla að reyna að gera eins mikið og ég get í verkefninu næstu vikuna svo ég geti átt góðan tíma með Dagrúnu en hún kemur til okkar þann 8. apríl og verður hjá okkur í viku, ohh það verður æðislegt að fá hana í heimsókn og sýna henni veröldina okkar hérna :)

Kveðja til allra sem ennþá nenna að kíkja hingað inn og bendi á að ég hef óskaplega gaman af því að fá smá kveðju í kommentunum hjá mér :)

Mikið að gera í skólanum

2009-03-12T09:12:00.006Z

Vinnuálagið í skólanum er óðum að aukast eins og vill verða þegar líður á önnina. Hún er líka langt komin því aðeins eru eftir um 2-3 kennsluvikur svo er verkefnavinna í apríl og prófin hefjast í byrjun maí. Eftir þessa viku er ég búin með eitt fagið, Fire Laboratory, í því er ekkert próf heldur er áfanginn metinn af vinnunni okkar og skýrslunum sem við skiluðum eftir hverja tilraun. Er s.s. að fara að skila tveimur síðustu skýrslunum á morgun og svo þarf ekkert að hugsa meira um þetta fag. Ég þarf að skila pre-dissertation 22. apríl og er það stórt verkefni sem gildir á við tvo kennda áfanga. Það er forvinna að lokaverkefninu mínu. Svo í maí eru það 3 próf.
En það er svo mikil verkefnavinna núna þessar síðustu kennsluvikur að öll kvöld og allar helgar fara í það. Ég fæ auðvitað enga samúð á þessu heimili frekar en fyrri daginn, Hildur bendir mér bara á að ég hafi viljað þetta, hahahaha....! Enda alveg satt hjá henni ;)

Að lokum smá myndasyrpa frá ferlega krúttilegri götu hérna í nágrenninu:

Ekki amarlegur þessi!!

Skilti að mínu skapi

2009-03-05T16:41:00.004Z

Það er pínulítill almenningsgarður hérna úti á horni hjá okkur, með smá grasbala og tveimur bekkjum undir stórum trjám. Það sem mér líkar best við við þennan garð er skiltið sem er við hliðið:

Þetta gleður svona anti-sportista eins og mig sem þolir ekki að sitja í rólegheitunum einhvers staðar úti í góðu veðri og fá svo helv... bolta í sig!

Vill svona skilti á fleiri almenningsstaði, boltaleikir geta verið innan ákveðinna svæða (nóg er nú búið að kosta til þess að byggja þau sérstöku svæði hvort eð er...).

Bolludagur - Sprengidagur/pancakeday

2009-02-27T09:42:00.004Z

Það var að sjálfsögðu haldið í íslenska siði á þessu heimili í vikunni. Ég bakaði nokkrar gerbollur fyrir okkur Hildi á síðasta sunnudag og svo var okkur boðið í bollukaffi á bolludaginn sjálfan til Ragnars og Agnesar. Mmmm, fengum yndislegar vatnsdeigsbollur og sko nóg af þeim...! Sem betur fer er heimleiðin aðeins niður á móti svo við gátum rúllað hingað heim eftir allt átið :)

Hérna halda þeir líka upp á sprengidaginn en ekki með saltkjöti og baunum, heldur pönnukökum. Dagurinn heitir s.s. "Pancakeday" í þessu landi. Ég var búin að ákveða að gera pönnukökumáltíð eða "crepes" en þegar leið á daginn í skólanum þá fór mig að langa meira og meira í baunasúpu svo ég kom við í Sainsbury's á leiðinni heim og keypti baunir, bacon og lauk, gulrætur og rófur. Ég keypti líka einn góðan bita af nýju lambakjöti til að hafa með. Mmmm, baunasúpan var svo góð þó það vantaði saltkjötið (setti bara extra mikið bacon í hana í staðinn) og hún dugði okkur vel í tvo daga. Þannig að pönnukökudagurinn var bara hjá okkur í gær (fimmtudag) í staðinn.

Að lokum set ég hérna inn myndir frá tilraunum sem ég var að gera í vikunni á eldi í fljótandi eldsneyti ("pool fires"), get ekki sagt annað en að það var alveg rosalega gaman!!

Gaman í skólanum!!!

Flottur logi!

Enn meiri missir í fjölskyldunni

2009-02-21T14:52:00.002Z

Í dag er borinn til grafar á Ísafirði fyrrverandi tengdapabbi minn og afi stelpnanna minna. Hann Guðmundur, eða Gummi afi eins og þær kalla hann alltaf, lést á þriðjudaginn og er mikill missir af honum kallinum. Hann var mér alltaf mjög góður þótt við værum ekki alltaf sammála um lífið og tilveruna, sérstaklega ekki kynjahlutverkin ;) en þar var hann af gamla skólanum þessi elska og fannst ég oft vera óttaleg grybba að ætlast til þess að Vignir tæki þátt í heimilisverkunum :) En við vorum samt góðir vinir og eftir að við Vignir skildum þá tók Gummi mér alltaf eins og ég væri áfram í fjölskyldunni og kunni ég virkilega að meta það.
Hann var líka óskaplega góður afi. Blíður og notalegur og stelpurnar elskuðu hann og dáðu. Eins og þær eru lánsamar að eiga fullt af ömmu og öfum, langömmum og langöfum ásamt langa-langömmu mínum megin þá var Gummi afi sá eini sem eftir var pabba þeirra megin í fjölskyldunni. Mikill er missirinn fyrir Vigni núna og sendi ég honum og allri fjölskyldunni hans mínar innilegustu samúðarkveðjur.
Það er voðalega leiðinlegt á svona stundum að okkar litla fjölskylda skuli vera sitt hvoru megin Atlandshafsins. Ólöf er fyrir vestan í jarðaförinni og langar mig til þess að vera til staðar fyrir hana þessa elsku en Hildur er jafn döpur hérna úti yfir því að geta ekki verið hjá pabba sínum á svona stundu.
Hvíl í friði elsku Gummi, ég efast ekki um að hún Lufa þín tekur vel á móti þér eftir tuttugu ára bið. Þakka þér samfylgdina með mér og stelpunum mínum -Blessuð sé minning Guðmundar Ólasonar!

Allt í rólegheitunum

2009-02-12T08:56:00.004Z

Já það er allt í voðalega miklum rólegheitum hjá okkur Hildi. Hún er að ná sér upp úr flensunni en það hefur tekið hana mikið lengri tíma heldur en það tók mig, hún er enn með ljótan hósta.

Skólinn hjá mér er núna fyrst kominn á fullt og nóg að gera. Ég verð að játa það að ég geri ósköp lítið annað þessa dagana en að læra og prjóna. Eins og ég hef örugglega sagt áður þá er prjónaskapurinn alger slökunarþerapía fyrir mig og veit ég fátt betra en að hlamma mér í sófann fyrir framan bara eitthvað í sjónvarpinu og prjóna, eftir að hafa legið yfir lexíunum allan daginn. Svo er líka bara svo gaman að skapa og búa eitthvað til :)

Það er ekki búið að vera eins rólegt yfir lífinu hjá henni mömmu minni og Gunnlaugi manninum hennar. Eins og ég sagði í síðustu færslum þá lést móðuramma mín og var hún jarðsett í síðustu viku. En daginn eftir að hún var jörðuð þá dó pabbi hans Gunnlaugs eftir frekar stutt en erfið veikindi og var einnig tvísýnt um móður hans aldraða en hún virðist eitthvað vera að hressast blessunin. Það er víst bara þannig með dauðann, við höfum enga stjórn á því hvenær kallið kemur. Það er því önnur jarðaför hjá þeim í þessari viku og um leið og ég sendi mömmu bestu afmælisóskir (hún átti afmæli á þriðjudaginn) þá sendi ég Gunnlaugi og hans fjölskyldu innilegar samúðarkveðjur.

Að lokum stenst ég ekki að setja hérna inn mynd sem ég fékk í tölvupósti í gær. Eflaust hafa margir ef ekki allir fengið þessa mynd senda en mér er alveg sama, mér finnst hún svo falleg og yndisleg. Hún er tekin í Ástralíu, í skógareldunum sem hafa geysað þar og sýnir að dýrin vita hvenær þau geta treyst á hjálp mannanna :) Látum þessa litlu fallegu sögu vera ljósið okkar inn í daginn og munum að stundum getum við gert pínulitla hluti sem geta kannski skipt miklu máli fyrir einhvern annan.

Einkunnir og fleira skrítið

2009-02-04T16:46:00.002Z

Ég er öll að koma til, svona heilsufarslega. Held að ég hafi bara sloppið nokkuð vel með bara nokkurra daga kvefpest. Ég náði samt að smita Hildi líka svo hún tók við af mér í vesældómnum.

Ég er enn ekki búin að fá neinar einkunnir síðan á haustönninni. Þetta er allt svo svifaseint hérna í þessum stóra skóla. Við áttum að fá einkunnirnar okkar á síðasta föstudag eða núna á mánudaginn en ég fékk e-mail í gær um það að niðurstöðunum úr akkurat þeim áföngum sem ég tók seinkaði eitthvað vegna snjóa og ófærðar á suður-Englandi!! Þá er það víst þannig að það er alltaf einhver utan þessa skóla sem þarf að skrifa upp á einkunnirnar og sá sem sér um þessa áfanga er þarna fyrir sunnan og hefur ekki komist í vinnuna í þessari viku. Þannig að þó að við hérna fyrir norðan séum ekkert í neinum sérstökum vetrarhörkum þá finnum við samt óbeint fyrir þeim - frekar fyndið!

En í dag er verið að jarða hana elsku ömmu mína í sveitinni og er hugur minn í allan dag búinn að vera hjá þeim þarna heima. Ég er samt í raun ekkert voðalega ósátt við að geta ekki fylgt henni síðasta spölinn því ég átti með henni góða stund áður en ég fór út í haust og þar áður margar góðar og skemmtilegar stundir sem ég ylja mér við að minnast. Mér finnst eiginlega erfiðara að vera ekki nálægt ömmu á Bökkunum í dag, hefði gjarnan viljað vera til staðar fyrir hana núna.

Kvef og leiðinlegheit

2009-02-01T16:56:00.002Z

Takk fyrir góðar kveðjur til mín og fjölskyldunnar. Gott er að eiga góða vini :)
Helgin hefur verið afskaplega súr og leiðinleg. Ég er komin með leiðinda kvef í nefi, eyrum og augum og sár í hálsi. Er langt frá því að vera fullhress en samt eiginlega ekki nógu veik til að liggja fyrir, óþolandi þetta milli-ástand! Ég er þess vegna hér um bil gróin föst við sama hornið í sófanum þar sem ég dorma yfir mis-lélegu sjónvarpsefni á milli þess sem ég hnerra og snýti mér. Eina útiveran þessa helgi var þegar við fórum út í búð og fylltum á matarforða heimilisins og enduðum á því að fara á KFC og kaupa fulla fötu af mat sem við tókum með okkur heim. Þegar heim var komið bjó ég til kokteilsósu til að hafa þetta alvöru og svo skáluðum við Hildur í kjúklingabitum með kokteilsósu fyrir henni ömmu heitinni! -Smá útskýring fyrir þá sem ekki þekktu ömmu í sveitinni en eitt það besta sem hún vissi voru kjúklingabitar frá KFC með frönskum og kokteilsósu :)

Kveðja með snýt, snýt og hnerr, hnerr....!!

Amma í Sveitinni

2009-01-28T15:32:00.003Z

Elskuleg amma mín í sveitinni dó í gær eftir erfið veikindi. Hún var búin að vera lungnaveik lengi en í fyrravor veiktist hún mjög alvarlega og hefur aldrei náð sér almennilega eftir það. Á meðan hún lá fárveik á sjúkrahúsi í apríl í fyrra, lést hann Jónas afi, maðurinn hennar skyndilega og var það mjög mikill missir. Þau voru alltaf mjög samrýnd hjón og gátu eiginlega ekki án hvors annars verið svo líklega kemur það fáum á óvart að það hafi orðið stutt á milli andláts þeirra.

Það eru frekar blendnar tilfinningar sem togast á í mér. Annars vegar þá er mér létt að amma þurfi ekki að þjást frekar, því lífið var henni afskaplega erfitt upp á síðkastið, en svo hins vegar þá myndast tómarúm þar sem hennar staður er og ég sakna hennar nú þegar. Það verður voðalega skrítið að koma heim og hafa enga ömmu í sveitinni!

Hvíl í friði elsku amma mín og ég veit að Jónas hefur beðið eftir þér með opinn arminn!

Seinni hlutinn

2009-01-26T21:36:00.002Z

Ég er alveg sammála Siggu frænku að mörgu leiti. Ég er ekki viss um að ég mundi endilega velja allar þessar bækur á svona lista en finnst gaman að þessu samt og langar að lesa margar þessara bóka. Það var svo sniðugt í dag þegar ég var uppi í skóla þá gekk ég inn í bókabúðina sem er þarna á campusinum (hmm mjög góð íslenska, ekki satt!!), þetta er pínulítil bókabúð en þar var í gangi tilboð, 2 fyrir 1 á klassískum bókmenntum. Þarna í fann ég á augabragði a.m.k. 10 af þessum 50 fyrstu sem ég setti inn í gær og kosta tvær bækur milli 5-6 pund. Ég held bara að ég sleppi einhverri óhollustunni í hverjum mánuði og kaupi mér frekar tvær góðar bækur :)

En hérna kemur seinni hluti listans, góða skemmtun:

51. Underworld – by Don DeLillo
52. The Catcher in the Rye – by J D Salinger
53. The Handmaid‘s Tale – by Margaret Atwood
54. Lolita – by Vladimir Nabokov
55. Austerlitz – by W G Sebald
56. The Tin Drum – by Günter Grass
57. The Glass Bead Game – by Herman Hesse
58. The Savage Detectives – by Roberto Bolano
59. London fields – by Martin Amis
60. One Hundred Years of Solitude – by Gabriel García Márques
61. My Name is Red – by Orhan Pamuk
62. Gulliver‘s Travels – by Jonathan Swift
63. The Strange Case of Dr Jekyll and Mr Hyde – by Robert Louis Stevenson
64. The Cairo Trilogy – by Naguib Mahfouz
65. Dr Zhivago – by Boris Pasternak
66. Crime and Punishment – by Fyodor Dostoyevsky
67. A Bend in the River – by V S Naipaul
68. Crash – by J G Ballard
69. If On a Winter‘s Night a Traveller – by Italo Calvino
70. The Leopard – by Giuseppe Tomasi di Lampedusa
71. The Dream of the Red Chamber – by Cao Xueqin
72. Dinner at the Homesick Restaurant – by Anne Tyler
73. All Quiet on the Western Front – by Erich Remarque
74. Waiting for the Mahatma – by R K Narayan
75. Cider with Rosie – by Laurie Lee
76. The Trial – by Franz Kafka
77. Catch-22 – by Joseph Heller
78. Alice‘s Adventures in Wonderland – by Lewis Carroll
79. Wide Sargasso Sea – by Jean Rhys
80. Oscar and Lucinda – by Peter Carey
81. The Name of the Rose – by Umberto Eco
82. The Stranger – by Albert Camus
83. Germinal – by Emile Zola
84. The Three Musketeers – by Alexander Dumas
85. The Red and the Black – by Standhal
86. Old Goriot – by Honoré de Balzac
87. On the Road – by Jack Kerouac
88. Eugene Onegin – by Alexander Pushkin
89. The Golden Notebook – by Doris Lessing
90. Under the Net – by Iris Murdoch
91. The Tale of Genji – by Lady Muraski
92. Cold Comfort Farm – by Stella Gibbons
93. Tinker, Tailor, Soldier, Spy – by John le Carré
94. Midnight‘s Children – by Salman Rushdie
95. The Sorrows of Young Werther – by Johann Wolfgang von Goethe
96. One Thousand and One Night – by Anon
97. The Hitchhiker‘s Guide to the Galaxy – by Douglas Adams
98. The Home and the World – by Rabindranath Tagore
99. To Kill a Mockingbird – by Harper Lee
100. The Lord of the Rings – by JRR Tolkein

Ég er bara búin að lesa þrjár af þessum lista svo mér reiknast til að ég eigi 95 eftir.....!

50 efstu bækurnar á listanum

2009-01-25T22:11:00.002Z

Þar sem ég þarf að pikka inn þennan lista upp úr blaðinu (sjá síðustu færslu) þá ætla ég að taka þetta í tvennu lagi. Það eru nefnilega nokkrir búnir að spurja mig eftir þessum lista svo hefst nú lesturinn:
100 Novels everybody should read in their livetime!

1. Middlemarch – by George Eliot
2. Moby-Dick – by Herman Melville
3. Anna Karenina – by Leo Tolstoj
4. The Portrait of a Lady – by Henry James
5. Heart of Darkness – by Joseph conrad
6. In Search of Lost Time – by Marcel Proust
7. Jane Eyre – by Charlotte Brontë
8. Disgrace – by J M Coetzee
9. Mrs. Dalloway – by Virginia Woolf
10. Don Quixote – by Miguel de Cervantes
11. Pride and Prejudice – by Jane Austin
12. Robinson Crusoe – by Daniel Defoe
13. David Copperfield – by Charles Dickens
14. Wuthering Heights – by Emily Brontë
15. The Code of the Woosters – by P G Wodehouse
16. Brighton Rock – by Graham Greene
17. Tess og the D‘Urbervilles – by Thomas Hardy
18. Scoop – by Evelyn Waugh
19. The War of the Worlds – by H G Wells
20. Tristram Shandy – by Laurence Sterne
21. 1984 – by George Orwell
22. A Passage to India – by E M Forster
23. Madame Bovary – by Gustave Flaubert
24. Ulysses – by James Joyce
25. The Moonston – by Wilkie Collins
26. Cranford – by Elizabeth Gaskell
27. Frankenstein – by Mary Shelley
28. Tom Jones – by Henry Fielding
29. Life: a User‘s Manual – by Georges Perec
30. Atonement – by Ian McEwan
31. Suite Francaise – by Iréne Némirovsky
32. A Dance to the Music of Time – by Anthony Powell
33. Clarissa – by Samuel Richardson
34. The Big Sleep – by Raymond Chandler
35. Lucky Jim – by Kingsley Amis
36. Les Misérables – by Victor Hugo
37. The Warden – by Anthony Trollope
38. The Great Gatsby – by F Scott Fitzgerald
39. Things Fall Apart – by Chinua Achebe
40. The House of Mirth – by Edith Wharton
41. The Hound of the Baskervilles – by Arthur Conan Doyle
42. The Adventures of Huckleberry Finn – by Mark Twain
43. The Rabbit books – by John Updike
44. Nausea – by Jean-Paul Sartre
45. The Voyeur – by Alain Rbbe-Grillet
46. The Prime of Miss Jean Brodie – by Muriel Spark
47. The Unbearable Lightness of Being – by Milan Kundera
48. Go Tell it On the Mountain – by James Baldwin
49. The Grapes of Wrath – by John Steinbeck
50. Beloved – by Tony Morrison

Lestrarhestur með sólarhringinn öfugan

2009-01-19T00:02:00.002Z

Ég hef alltaf verið kvöldsvæf og ekki nóg með það heldur verð ég líka að fá minn svefn og ekkert raus! Það er mjög seint fyrir mig að fara að sofa eftir miðnætti ef ég á að vakna til vinnu eða skóla morguninn eftir og ef ég fæ ekki mína átta tíma þá er ég hreinlega ónýt og væri vís með að dotta einhvers staðar á miðjum degi.
En núna er ég sko búin að snúa öllu saman á hvolf. Vaki fram eftir nóttu og sef til hádegis. Þetta fer ferlega illa í mig enda verður manni miklu minna úr verki á nóttunni heldur en á morgnana svo tíminn nýtist mjög illa. Ég hef út þessa viku til þess að klára stóra verkefnið mitt og nú þarf ég virkilega að gefa í því að ég á alveg helling eftir. Svo núna hreinlega verð ég að reyna að koma háttatímanum í eðlilegt horf aftur!

Að öðru, ég keypti dagblað hérna um helgina og það er sko gaman að kaupa helgarblöðin hérna. Þau eru á við heila bók með öllum aukablöðunum og dótinu og draslinu sem þeim fylgir. Fékk t.d. tvær gamlar DVD myndir, eitt lítið tímarit ásamt öllum aukablöðunum. Í einu af þessum aukablöðum var skemmtilegur listi yfir 100 bækur sem maður ætti ekki að láta framhjá sér fara á lífsleiðinni (100 "must read" books). Eins og ég er mikill bókaormur þá komst ég að því að ég er bara búin að lesa 3 af þessum bókum og svo hef ég séð sjónvarpsþætti eða kvikmyndir upp úr öðrum þremur eða fjórum. En þetta eru einmitt þessar frægu klassísku sem flestir hafa einhverntíman heyrt um og margar hverjar sem mig hefur alltaf langað til að lesa. Ég held að ég geymi þennan lista og setji mér það markmið að feta mig í rólegheitunum eftir honum út ævina. Flott markmið ekki satt? :)

Lífið heldur áfram

2009-01-14T12:37:00.002Z

Lífið hjá okkur mæðgum er að komast í fastar skorður aftur eftir heimferð Hildar, prófatörn og jól. Hildur er byrjuð í skólanum sínum en ég er enn í verkefnavinnu, byrja í tímum aftur seinna í mánuðinum.
Þar sem ég byrjaði þessa bloggsíðu í upphafi til þess að skrifa mig upp úr kvíða-og þunglyndis veikindum mínum þá hef ég reynt að setja inn hugleiðingar um þá líðan mína öðru hvoru. Ég upplifði mjög merkan og yndislegan áfanga í þessari ferð minni upp úr pyttinum, núna um jólin. Ég varð pínulítið einmanna eða "blue" þegar ég sat og skoðaði videó að heiman og talaði við fjölskylduna og felldi nokkur tár fyrir svefninn EN... ég réði við það!!! Vaknaði bara hamingjusöm og í góðu jafnvægi daginn eftir og gat notið dagsins. Þetta hljómar líklega ekki merkilegt í margra eyrum en fyrir mig, sem er búin að kljást við mjög erfið kvíðaköst í yfir 8 ár þá var þetta afskaplega stórt skref og mjög svo kærkomið. Ég s.s. réði við eðlilegar tilfinningasveiflur!! Án þess að leggjast undir sæng í 1-2 daga og sjá enga leið út - án þess að hjartslátturinn færi á hundrað og kuldinn hertæki mig alla!! - Þetta er líklega eitt stærsta skrefið í mínu bataferli og mér leið svo vel að geta ráðið við þetta á eðlilegan hátt.

En ég hef líka verið áhyggjufull undanfarið eins og líklega allir eru á þessum síðustu og verstu tímum. Ég veit ekkert hvað verður þegar ég kem heim í haust (- aftur; eins og líklega allir aðrir). Hvar finn ég mér íbúð? Verður næg vinna? (lítur ekki þannig út núna)
Ég er svona lauslega búin að setja 5 ára markmið sem er ósköp einfallt. Ég ætla að reyna að finna íbúð sem uppfyllir lágmarks skilyrði, (geri ekki miklar kröfur aðal málið er að ég ráði við að borga leiguna) og vinna eins mikið og í boði verður til þess að greiða niður skuldir.
Varðandi húsnæði þegar ég kem heim, þá er ég ekki í þeirri stöðu að geta keypt eitthvað (því miður) þar sem ég á ekkert til að leggja út í útborgun. Ef einhver þarna úti er einn og er að spá í að fara að kaupa sér húsnæði á næstunni þá væri tilvalið að slá saman - ekki satt?? :)

Jæja, það var kominn tími á smá alvarlegt blogg því það er jú það sem við erum að kljást við alla daga, ekki satt?

Kveðja og knús á alla...

Hogmanay

2009-01-02T21:19:00.006Z

Það var skemmtilegt að upplifa stemminguna niðri á Princes Street og nágrenni á gamlárskvöld. Áætlað er að um 100.000 manns hafi verið í bænum og þar á meðal við Hildur :) Við náðum engum sérstaklega góðum myndum, nema þessari:

Og svo svona til að gefa smá hugmynd um mannfjöldann:

Það var alveg hægt að ganga um þó það líti ekki þannig út á myndunum. Mestu þvögurnar voru að sjálfsögðu við sviðin þrjú þar sem tónlistaratriðin fóru fram. Mér leist best á sviðið með ferlega flottri poppaðri þjóðlegri tónlist, það var frábær blanda og stuðið geðveikt!

Að vera svo þarna í mannfjöldanum á miðnætti þegar talið var saman niður síðustu 10 sekúndurnar, var einstakt og rosalega gaman aðupplifa það. Svo brast í FJÖLDA- söng þegar allir sungu "Auld Lang Syne". Skemmtileg lífsreynsla og gaman að prófa þessa stemmingu en ég held samt að ef maður ætli að fá sem mest út úr svona kvöldi þá væri skemmtilegast að vera saman í góðum hópi fólks.

Við Hildur vorum voðalega stilltar og prúðar og komum okkur heim á leið fljótlega eftir flugeldana á miðnætti á meðan svakalega flott laser-show lét um himininn. Við vorum háttaðar og komnar undir sæng með bækurnar okkar klukkan rúmlega eitt...!

Gleðilegt ár til allra!

Hildur komin til baka

2008-12-30T13:50:00.002Z

Ég var komin út úr dyrunum klukkan rúmlega sjö í morgun til þess að fara til Glasgow að taka á móti Hildi. Strætó-lest-strætó og svo aftur strætó-lest-strætó, allt tók þetta um 5 tíma, þ.e. með svolítilli bið á flugvellinum. En hvað það var svo yndislegt að fá stelpuna heim aftur, glaða og fína eftir góðan tíma á Íslandi. Ég vildi bara að Ólöf og Rútur hefðu getað komið líka og verið með okkur yfir áramótin en því miður þá leyfir efnahagsástandið það ekki.

Ég er búin að hafa það ljómandi gott um jólin. Átti rólegt og gott aðfangadagskvöld með Sigga, Ingu og Þóri Snæ og fór svo í al-íslenskt jólaboð á jóladag til Ragnars skólabróður míns og Agnesar konu hans. Þar var boðið upp á hangikjöt með öllu tilheyrandi þar á meðal ORA grænum baunum og Malt/Appelsínblöndu mmmm......!
Á laugardaginn buðu leigusalarnir mínir, Judy og Goff mér í skemmtilegan göngutúr um stíga hérna í kring og á eftir heim til þeirra í kjarngóða súpu og brauð. Svo þið sjáið það að það er vel hugsað um mig hérna og passað upp á að mér leiðist ekki svona ein :)

Veðrið hefur verið frábært öll jólin. Stilla og hlýtt til að byrja með en svo fór að kólna og er núna fallegt vetrarveður, sól, logn og frost. Miðbærinn er iðandi af lífi, bæði vegna útsala og líka vegna yfirvofandi hátíðahalda yfir áramótin. Hérna er nefnilega mikil hátíð um áramótin, Hogmanay, sem hófst í gærkvöldi með frábæru sjónarspili. Mikið hefði verið gaman af einhverjir hefðu getað komið og notið þessa með okkur en því miður þá er það ekki svo. Við Hildur njótum bara fyrir ykkur öll :)

Farið varlega um áramótin og takk fyrir allt gamalt og gott!

Áramótakveðja frá mæðgunum í Edinburgh!

Jól í Edinborg

2008-12-24T16:47:00.003Z

Aðfangadagur er langt liðinn og það er ekki laust við að ég sé hálf meir. Mér líður ljómandi vel og er í raun bara mjög hamingjusöm með lífið mitt en það er auðvitað skrítið að vera í fyrsta skiptið í 19 ár án barnanna minna um jólin. En þar sem þær eru komnar heilu og höldnu til Ísafjarðar til pabba síns og fjölskyldu ásamt því að þar er líka næstum öll mín fjölskylda fyrir þær, þá er ég ánægð.

Ég fór í 6 klukkutíma göngu-/slæpiferð í gær. Skoðaði hluta af Þjóðmynjasafni þeirra Skota og eina stóra Dómkirkju ásamt því að rölta um og skoða mannlífið (sem mér finnst alltaf svo gaman). Ég gerði einnig jólagóðverkið sem við Hildur vorum búnar að koma okkur saman um að gera. Það er einn heimilislaus maður sem situr alltaf á sama staðnum niðri á Princes Street með hundinn sinn. Hann vefur alltaf hundinn inn í teppi og svefnpoka og svo húka þeir þarna ræflarnir. Rétt áður en Hildur fór heim til Íslands þá sáum við að hann var kominn með 3 hunda. Greinilega par og lítill hvolpur og þannig er það enn. Þarna situr hann með hundana vel vafða inn í eitthvað hlýtt og með hvolpinn innvafinn í fanginu. Hundarnir skipta sér aldrei af neinum vegfarendum og er greinilegt að þó manngarmurinn hugsi ekki vel um sjálfan sig þá er hann góður við hundana. Svo að ég gerði það sem við Hildur vorum búnar að ákveða að ég mundi gera fyrir jólin, ég fór og keypti einn poka af hundamat og smá hundanammi og bætti við einni stórri langloku og smá jólakökum og færði þeim félögum. Vildi frekar gera það en að henda einhverju klinki í húfuna hans. Kallræfillinn þakkaði voða vel og ég fékk að gefa voffunum nammið sitt :)

Í dag fór ég svo í góðan göngutúr með Ingu og Þóri Snæ svo snúður litli gæti lagt sig í kerrunni sinni og verið hress fyrir kvöldið. Yndislegt veður og allt að 10°C hiti úti. Næst á dagskrá er svo bara jólabaðið og svo jólamatur hjá Ingu og Sigga við hliðina.

Ég þakka innilega allar góðar kveðjur og óska öllum gleðilegrar hátíðar!

Prófin búin og jólin á næsta leiti

2008-12-21T19:35:00.002Z

Prófin eru búin. Þessi prófatörn var mjög erfið og ég get varla sagt að ég viti hvað varð af því sem af er desember. Ég fór í fjögur próf, tvö burðarþolspróf og tvö í brunafögum. Mér gekk mjög illa í einu prófinu en ég vona að ég hafi náð hinum. Núna á ég eftir að gera eina ritgerð sem tilheyrir þessari önn en að öðru leiti er hún búin. Ég vona að ég nái að afla þeirra gagna sem nauðsynleg eru vegna ritgerðarinnar á mánudag og þriðjudag svo ég geti stússast eitthvað í þessu um jólin. Ég hef svo eitthvað fram í janúar til þess að klára hana.
Skólinn byrjar aftur 12.janúar en ég held að ég þurfi ekki að fara í tíma fyrstu 3 vikurnar. Nota þær þá í að byrja á næstu stóru ritgerð sem á að gera á vorönninni.

Ég var orðin svo gersamlega úrvinda eftir síðustu viku, var í einu prófi á mánudag, því næsta á miðvikudag og svo því síðasta á föstudaginn. En léttirinn var líka mikill um hádegi á föstudaginn þegar þetta var allt saman búið. Ég hélt upp á próflokin með Sigga, Ingu og Þóri litla nágrönnum mínum, við fórum út að borða á spænskum veitingastað þar sem við fengum okkur Tapas og eitt gott glas af Sangríu :)

Helgin hefur svo verið yndisleg. Búin að fá pakka að heiman með piparkökum, íslensku nammi og íslenskum jólalögum og fullt af myndum af krökkunum hennar Dísu systir. Svo fékk ég líka tvo diska með vídeói frá 100 ára afmælinu hennar ömmu um daginn svo þið getið rétt ímyndað ykkur hvort það voru ekki votir hvarmar hérna í gærkvöldi! Ég á svo yndislega fjölskyldu - þið eru sko lang- lang best!!!
Í gær (laugardag) dressaði ég mig upp og fór niður í miðbæ og drakk í mig jólastemminguna þar. Fékk mér heitt kakó með rommi og vöfflu með vanillusósu og kirsuberjum, mmmmmm!!! Svo bara rölti ég um í rólegheitunum, ekkert sem kallaði á mig og ég náði að bara njóta þess að vera til.
Í dag þreif ég íbúðina við undirleik yndislegra jólalaga, setti upp pínu skraut og fór svo út í búð og keypti það sem mig vantaði matarkyns.

Ég bið að heilsa í bili, kveðja frá einbúanum í Edinborg.

Ólöf í Fréttablaðinu í dag

2008-12-11T14:55:00.003Z

Þökk sé tækninni þá gat ég fengið að sjá Fréttablaðið í dag þar sem er smá viðtal við hana Ólöfu krúsídúllu (já ég veit, þú ert ekkert ánægð með að ég kalli þig svona en ég má- ég er mamman!!)
Ég reyndi að setja link beint inn á síðuna hérna en það mistókst svo að slóðin er (fyrir þá sem ekki fá blaðið): http://vefmidlar.visir.is/VefBlod/?paper=fbl og þar inn á blaðið 11.desember og ef þið farið í html útgáfu þá veljið þið blaðhlutar og Allt og þar er hún blessunin.
Ef mér tekst að finna út úr því hvernig ég get sett þetta hérna inn þá geri ég það annars verður þetta að duga.

Ein í kotinu

2008-12-08T19:45:00.003Z

Hildur er búin að vera heima á Íslandi í eina viku og er alsæl. Hún hefur farið í skólann, þar sem hún er ennþá skráð í bekkinn þá var það ekkert mál og verið með vinkonum sínum alla daga.

Ég hef ekki haft neinn tíma til að sakna hennar þar sem síðasta vika var síðasta kennsluvikan í skólanum og fullt -fullt af verkefnum sem þurfti að skila. Svo fór ég í fyrsta prófið í dag svo helgin fór í að læra fyrir það. Prófið var í sjálfu sér ekkert rosalega erfitt en maður hefði þurft a hafa helmingi lengri tíma eða þá að vera tvöfallt fljótari að reikna! Svo ég er ekkert voðalega bjartsýn með útkomuna.

En jæja jæja, það kemur allt saman í ljós og núna þarf ég að einbeita mér að næstu þremur prófum sem eru í næstu viku.

Kveðja til allra sem eru að jólast, ég er búin að setja upp eina jólaseríu í stofugluggann, kaupa eina jólarós og hengja fina jólasveininn minn utan á hurðina. Þá telst mínum jólaundirbúningi lokið :)

Hildur á leiðinni heim

2008-11-30T13:54:00.002Z

Við mæðgur erum búnar að pakka og svo liggur leiðin á eftir til Glasgow þaðan sem Hildur flýgur heim til Íslands í kvöld.
Við áttum yndislega stund á föstudagskvöldið þegar við elduðum íslenskt lamalæri með alles og buðum Sigga, Ingu og Þóri nágrönnum okkar í mat. Þau komu með salat, rauðvín og ÍS og við sátum hérna fram eftir kvöldi og átum og drukkum. Þetta voru eiginlega litlu-jólin fyrir Hildi :)
Það er nú meira hvað hann Þórir Snær er góður. Hann er um 16 mánaða gamall og það heyrist ekki í honum allt kvöldið. Hann var bara að dunda sér með eitthvað dót úr eldhússkápunum hjá mér og það eina sem benti til þess að hann væri orðinn þreyttur og sybbinn var að hann fór að nudda á sér augun - ekki einu sinni pirraður eða rellinn þótt það væri komið langt fram yfir háttatíma :) -Takk fyrir góða kvöldstund grannar!

Niður og svo aðeins upp aftur

2008-11-26T22:50:00.003Z

Ég tók smá niðursveiflu á geðinu í lok síðustu viku. Fór að efast stórlega um sjálfa mig, sérstaklega hvort ég hefði yfirhöfuð nokkuð að gera í þessu námi. Það er búið að reynast mér mjög þungt og er vinnuálagið mikið. Sérstaklega verður öll vinna svo tímafrek þegar mér finnst ég ráða illa við viðfangsefnið. EN... ég tók í hnakkadrambið á sjálfri mér á mánudagsmorguninn, reif mig upp úr rúminu eldsnemma og átti tiltal við sjálfa mig (þið hefðuð átt að sjá til mín fyrir framan stóru spegla-skápahurðirnar í herberginu mínu!!). Ég lét mig bara vita það að ég gæti þetta vel enda væri ekkert annað val því ég hefði hætt fyrir nokkrum árum síðan þeim ósið að gefast upp þegar á móti blæs. Eftir þetta harðorða tiltal arkaði ég í skólann og svei mér þá ef ég skildi ekki bara smá af því sem kennarinn var að segja (en ath! -bara smá!). Þannig að núna er ég betur sett andlega til að takast á við lokatörnina á þessari önn. Full af orku og ákveðni - ég skal gera mitt besta til að klára þetta og hver útkoman verður- kemur í ljós!

Að lokum, þegar ég er búin að læra yfir mig og þarf að slaka á og kúpla mig út, þá venjulega prjóna ég. Í haust keypti ég hins vegar smá jóla-föndur til þess að sauma og hef verið að dúlla mér við það meðfram prjónaskapnum sum kvöldin. Hérna er mynd af afrakstrinum, þessi fer utan á hurðina á íbúðinni fyrir jólin:

100 ára aldursmunur

2008-11-22T10:07:00.004Z

Ég fékk þessa mynd senda frá mömmu. Þessi litli drengur fæddist á Fjórðungssjúkrahúsinu á Ísafirði á afmælisdaginn hennar ömmu, 19.nóvember. Ömmu þótti afskaplega vænt um að fá að hitta þennan litla mann og mömmu hans. Það spillti ekki fyrir að hann er barnabarn Hjálmars í Hrauni sem hefur óbeðinn séð um að moka snjóinn frá húsinu hennar á Bökkunum undanfarna óteljandi vetur. Þið getið rétt ímyndað ykkur velvildina sem maðurinn hefur unnið sér inn hjá þeirri gömlu :)

Já og til að svara síðustu kommentum, þá er meilið hjá mér anna@vsi.is og Ásdís, ég skæli örugglega helling þegar ég horfi á væntanlegt vídeó, það verður ekki hjá því komist!

Kveðja frá sólríkum laugardegi í Edinborg

100 ára!

2008-11-19T08:26:00.002Z

Þann 19. nóvember árið 1908 fæddist stúlkubarn í húsinu við Sundstræti 33 á Ísafirði og þar hefur hún búið síðan. Henni var gefið nafnið Herdís og hefur alla tíð síðan verið kölluð Dísa Alberts. Ég er auðvitað að tala um hana langömmu mína sem við systkinin köllum alltaf Ömmu á Bökkunum en börnin okkar kalla Löngu.

Amma á eina dóttur, 5 barnabörn, 10 langömmubörn og 16 langa-langömmubörn (ef ég hef talið rétt).

Í dag er eini dagurinn síðan ég flutti hingað út sem ég hefði viljað vera heima. Þá meina ég auðvitað heima á Ísafirði til þess að fagna þessum degi með ömmu og allri fjölskyldunni. En það er víst ekki í boði svo ég hugsa bara sterkt heim og er með henni í huganum.

Elsku amma/Langa,

INNILEGA TIL HAMINGJU MEÐ 100 ÁRA AFMÆLIÐ!!!

Myndir

2008-11-17T22:27:00.008Z

Ég hef ekki verið dugleg að setja inn einhverjar myndir hérna en það er aðallega vegna þess að við Hildur erum ekkert sérlega duglegar að muna eftir því að taka myndavélina með okkur þegar við förum eitthvað og ef hún er með þá annað hvort höfum við ekki munað eftir því að hlaða rafhlöðuna eða við gleymum bara að taka myndir.

Ég nefndi það um daginn að við áttum mjög skemmtilegan dag í dýragarðinum með fleiri Íslendingum og hér eru nokkrar myndir af íbúunum þar:

Þessar mörgæsir eru frábærar þó það sé ferlega vond lykt af þeim. Ferlega fyndnar þegar þær fara í gönguferð um garðinn :)

Þessi var nýkominn í dýragarðinn en var alveg eins og hann hefði alltaf verið þarna.
Ferlega virðulegur og flottur.

Það var þarna sebrafölskylda; mamma, pabbi og litla folaldið. Ég kallaði þetta nú "Náttfatahesta" hérna í gamla daga :)

Þessi snáði á að vísu ekki heima í dýragarðinum en þessi mynd var samt tekin af honum þar. Þetta er sæti nágranni okkar hann Þórir Snær að svala þorsta sínum á góðviðrisdegi :)

Spurning um að fara að endurskoða...

2008-11-10T13:17:00.002Z

... lífið???
Verð að deila með ykkur grátbroslegri sögu.
Hildur kom, eins og oft um helgar, uppí til mín á laugardagsmorguninn til að kúra aðeins. Þar sem við vorum að spjalla þá ætlaði hún eitthvað að snerta andlitið á mér, bursta í burtu kusk eða eitthvað svoleiðis, svo ég mynnti hana á að ég þoli ekki að andlitið á mér sé snert þegar ég er nývöknuð. Eða allavega þá er mér ekki vel við það. Hildur fer að hlægja að þessari sérvisku í mömmu sinni og segir einu sinni sem oftar að ég sé einum of sérvitur :)
Svo segir hún: "en þegar þú áttir kærasta, máttu þeir þá ekki kyssa þig á morgnana?" ...... Ég hugsaði, hugsaði og hugsaði..... en svarið er: ÉG MAN ÞAÐ EKKI!!! Það er s.s. orðið svo langt síðan ég vaknaði við hliðina á karlmanni að ég man ekki lengur hvernig það er!!!!! Ó mæ, við hlógum mikið þegar ég áttaði mig á þessu og komumst að því að ég væri líklega ekki AÐ pipra heldur væri ég hreinlega ORÐIN pipruð!!

Pipraðar kveðjur frá Edinborginni :)

Skolablogg

2008-11-06T10:11:00.003Z

Er ad blogga fra tolvuveri skolans svo tad eru engir islenskir stafir.
Eg var ad koma af fundi med kennaranum hennar Hildar tar sem eg atti vid hann mjog gott spjall um Hildi og lidan hennar herna. Hann aetlar ad tala vid hana sjalfa i naestu viku og er med einhverjar hugmyndir um hvernig vaeri haegt ad gera henni dvolina herna baerilegri. Vona ad tad beri einhvern arangur. En allavega ta tok hann bara vel i ad hun vaeri i frii allan desember til ad fara heim.

Annars er allt tad sama hja okkur. Vinnualagid hja mer i skolanum er alveg svakalegt og allt i einu er onnin langt komin og skilaverkefnin hrugast inn. Ef staerdfraedin min og staerdfraedihugsunin min vaeri eitthvad skarpari ta vaeri tetta kannski adeins audveldara en tad er tvi midur ekki svo. Tannig ad tad eina i stodunni er ad eyda meiri tima i hvert verkefni tangad til heilinn er ordinn ad mauki og raud blikkandi ljos byrtast fyrir augunum sem segja: ERROR- ERROR- OVERLOAD!!! EN... tetta er samt frabaert og verdur orugglega tess virdi tegar tetta er buid :)

Set inn myndir af ferd sem vid maedgur forum i sidasta sunnudag herna ut fyrir borgina tegar eg nenni. Annars bid eg ad heilsa i bili...

Leigan þennan mánuðinn í höfn

2008-10-29T16:06:00.002Z

Jæja, loksins bárust peningarnir fyrir októbermánuð inn á skoska bankareikninginn minn og ég gat í gær farið og borgað leiguna fyrir þennan mánuð. Þá á bara eftir að koma í ljós hvort ég þarf að fara sömu löngu boðleiðina, í gegnum Seðlabankann, í hverjum mánuði hér eftir! Það kemur bara í ljós.

Annars ekkert að frétta nema að það er brjálað að gera í skólanum og svo ég sé alveg hreinskilin, þá er þetta nám alveg helv.... þungt!!! Úff-púff og púffffff!!

Smá fréttir af okkur

2008-10-26T20:18:00.007Z

Úff, það er bara pressa á mann að blogga oftar!! Jæja jæja ég skal reyna að finna eitthvað til að segja ykkur :)

Vikan sem mamma var hérna hjá okkur var yndisleg þrátt fyrir rysjótt veður. Við þrjár áttum notalegar stundir saman og skoðuðum búðir og fallega staði hérna í borginni. Mamma bauð okkur Hildi svo út að borða eitt kvöldið og fórum við á ítalskan veitingastað þar sem við fengum frábæran mat. Mamma fór svo aftur heim á fimmtudaginn og það var eins gott að hún átti ekki pantað far daginn eftir því að mér skilst að veðrið heima hafi verið þannig að meira að segja millilandaflugið raskaðist!

Hérna hefur veðrið svosem ekki verið neitt skemmtilegt undanfarið, rok og rigning en við höfum samt ekki fengið eins slæmt og þið þarna heima, að mér skilst.

Það er samt svo fyndið að vera í svona öðruvísi umhverfi en maður er vanur. Ég hugsa að þess vegna taki maður eftir alls konar litlum hlutum sem heimamönnum finnast ósköp venjulegir. T.d öll þessi laufblöð sem eru að falla (já og fjúka) af trjánum núna. Þau fjúka nefnilega í skafla eins og snjórinn og mér finnst það svo ferlega fyndið.

En að öðru. Hildi hefur ekki gengið mjög vel að aðlagast lífinu hérna. Hún á erfitt með að finna sér vini í skólanum og finnst hún hvergi passa inn í hópinn. Hún saknar mikið vinkvenna sinna heima en er sem betur fer í góðu sambandi við þær í gegnum tölvuna. Þetta hefur orðið til þess að hún er voðalega dauf dags-daglega og líður greinilega ekkert vel hérna. Ég held að þetta tengist aldrinum aðallega vegna þess að það er afskaplega erfitt að breyta alveg um umhverfi og félaga þegar maður er 14 ára. Það er ekki eins og sjálfstraustið sé að fara með mann á þeim aldri.....! En til þess að reyna að hjálpa henni í gegnum veturinn þá er ég búin að panta fyrir hana far heim um jólin. Ég fann hjá mér ferðapunkta á kreditkortinu mínu sem pössuðu akkurat fyrir fari fyrir hana fram og til baka. Fyrst pantaði ég far heim þann 14.desember og hingað út aftur þann 30.des. Það voru nefnilega allar ferðir eftir áramótin svo svakalega dýrar en þessi dagur var á góðu verði. En nokkrum dögum eftir að ég gekk frá þessari pöntun þá fékk ég mail frá Icelandair um að það væri búið að fella niður flugið þann 14. desember og einni öll önnur flug til og frá Glasgow í desember nema þann 30. Einnig að það yrði ekkert flogið til og frá Glasgow í janúar, febrúar og mars á næsta ári!!! Ég hringdi í Icelandair og sú sem ég talaði við athugaði með flug frá Manchester en það var líka búið að fella það niður í desember svo ég bað hana að athuga hvenær síðasta flug frá Glasgow yrði í nóvember og það er þann 30. nóv. Ég bara bókaði Hildi heim þá svo hún fékk þarna allt í einu heilan mánuð heima!!! Ekkert smá glöð með það stúlkan og ég er það líka hennar vegna. Hún fær að vera hjá Ólöfu systir sinni í Reykjavík þangað til þær fara saman vestur og verða hjá pabba sínum og fjölskyldu um jólin. Þannig fær hún að hitta vinkonurnar og að fara í skólann sinn í Reykjavík þangað til þær fara vestur. Ég held líka að það verði gaman fyrir þær systur að eiga saman jól í eitt skipti með Vigni og Rebekku og krökkunum þeirra, þær hafa jú alltaf verið hjá mér um jólin.

Ég verð því ein hérna í Edinborg um jólin því ég sé ekki fram á að fá neina heimsókn að heiman. Bæði vegna gengisins og þar sem þá þyrfti að fljúga í gegnum London og það er bara orðið of mikið vesen og of dýrt. Mér líst samt ekkert illa á þennan mánuð hérna ein og hvað eru ein jól á milli vina? Það koma önnur jól eftir þessi og ég er líka einhvern vegin þannig gerð að mér líkar afskaplega vel að fá að vera ein stundum, hef eiginlega bara þónokkra þörf fyrir það.

Að lokum myndir frá heimsókn mömmu, eins og sjá má þá snérist allt um það að borða ;)

Allt gengur vel - nenni ekki að blogga þessa dagana

2008-10-18T15:51:00.002Z

Þið, mínir dyggu lesendur (ef einhverjir eru) verðið að fyrirgefa bloggletina undanfarið. Andinn hefur bara ekki verið yfir mér, hann hefur verið upptekinn við skólaverkefni og daglegar áhyggjur.
En það er allt gott að frétt af okkur Hildi. Þó það hafi enn ekki tekist að millifæra neina peninga hingað í land Skota þá byrti heldur betur yfir heimilinu þegar við fengum mömmu í heimsókn á síðasta fimmtudag. Hún kom færandi hendi með bæði íslenskan mat og útlenska peninga. Svo nú sitjum við á kvöldin, búnar að borga gas-og rafmagnsreikning og belgjum okkur út af lakkrís :)

Segi meira seinna, þarf að fara að elda íslenskan lambahrygg.... :)

Námsmaður erlendis

2008-10-10T15:52:00.002Z

Ég hef hreinlega ekki haft geð í mér til að blogga neitt alla vikuna. Auðvitað höfum við mæðgur fylgst með fréttunum að heiman um öll ósköpin sem dynja yfir þjóðina í efnahagsmálunum en það er fyrst núna sem þetta bitnar beint á okkur.
Þannig er að ég sótti um reikning hjá Bank of Scotland í byrjun september en hef ekki getað byrjað að nota hann almennilega af því það gekk svo hægt að fá IBAN númerið sem ég þarf til þess að geta fært peninga á milli landa. Í gær fékk ég loksins þetta númer og ætlaði í morgun að millifæra af LÍN-reikningnum mínum sem er í Glitni (og er gjaldeyrisreikningur í pundum) yfir á Skoska reikninginn. En, nei nei, það er lokað fyrir allar millifærslur úr landi.....! Þannig að eins og er þá er ég í þeirri stöðu að geta ekki borgað leiguna, sem ég á að borga á morgun og ekki hita- og rafmagnsreiknnginn sem kom i gær og er á gjalddaga! Ég hef hingað til þurft að nota kreditkortið mitt til að taka út peninga en hver veit hvenær þeir loka líka á það????
Ég ætla að vera róleg fram yfir helgi og vona að þeir losi eitthvað um í næstu viku (taka smá Pollýönu á þetta) en ef ekkert skeður á næstu dögum þá held ég að ég leyfi mér að panika!

Þetta ástand hefur líka komið illa niður á Ólöfu og Rúti og þar er þetta farið að hafa keðjuverkandi áhrif sem sér ekki fyrir endann á.

Svo er ástandið hérna líka þannig að maður er ekkert endilega að segja frá því að maður sé frá Íslandi, hehehe... fólk grínast með það að það sé hálfgert bannorð þessa dagana ;)

Hogmanay um áramótin

2008-10-03T12:06:00.002Z

Jæja, hverjir ætla að koma til mín um áramótin?
Miðasala á Edinburghs Hogmanay er hafin og ef maður kaupir strax þá getur maður fengið miðann á 5 pund í stað 10 punda.
Hogmanay er svona götu karnival með tónleikum og alls konar skemmtun. Sjá betri lýsingu hér!!!

Skólinn byrjaður

2008-09-30T07:59:00.003Z

Núna er námið hafið og strax komin heimaverkefni enda byggist þetta nám í töluverðu mæli á verkefnavinnu en minna á fyrirlestrum eða setu í tímum. Ég sé fram á að það verði mikið vinnuálag í vetur og svei mér þá ef ég hlakka ekki bara til ;)

Ég er allavega mjög fegin því að vera byrjuð að gera eitthvað af viti aftur. Þessi rúmi mánuður sem ég hef haft síðan við Hildur komum hingað út hefur verið helst til langur. Jú það var mjög gott að hafa tíma til þess að vera til staðar fyrir Hildi á meðan hún komst inn í skólaumhverfið sitt og til þess að átta okkur á umhverfinu og svoleiðis en ég man ekki hvenær ég var síðast í rúman mánuð í fríi að gera næstum ekki neitt!!! Fyrst fannst mér þetta æðislegt og lá í leti á milli þess sem ég kannaði umhverfið en svo var þetta bara farið að vera leiðinlegt. Ég held að það sé í eðli okkar mannanna að vilja hafa eitthvað fyrir stafni. En allavega þá varð þetta frí til þess að ég kem úthvíld og endurnærð til starfa í skólanum og ætti að hafa næga orku til að takast á við verkefni vetrarins.

Að lokum er hérna ein mynd sem Hildur tók um síðustu helgi. Haustlitirnir eru ekki orðnir alls ráðandi hérna ennþá en samt aðeins farnir að láta á sér kræla. Okkur fannst þetta tré ferlega fyndið, ein sjálfstæð grein í þessari risa-laufkrónu sem ákvað að það væri komið haust. Kannski vildi hún fá að vera "ein í hóp" eins og sumir.....!

Námskeið og skólabyrjun

2008-09-23T12:58:00.002Z

Skólinn átti að byrja í gær en þar sem kennararnir sem áttu að kenna í gær og í dag eru á ráðstefnu í Þýskalandi þá verður fyrsti tíminn í fyrramálið.
Ég fór í síðustu viku og fékk stundatöflu og allar upplýsingar sem mig vantaði varðandi námið. Þetta er allt voðalega persónulegt, maður gengur að kennurunum þegar maður vill, engar tímapantanir eða svoleiðis. Deildin er það lítil og allir þekkja alla.
Ég þarf að velja mér efni til að skrifa um í lokaverkefninu mínu fyrir lok þessarar viku og fékk ég lista með nokkrum hugmyndum sem ég get valið úr. Ég get líka komið sjálf með hugmyndir en mér líst mjög vel á nokkrar á þessum lista svo ég held að ég haldi aðeins áfram að grúska í þeim áður en ég tek endanlega ákvörðun.
Eftir að hafa skoðað fögin sem ég verð í í vetur, þá er ég ennþá spenntari fyrir þessu námi og hlakka mjög til vetrarins.

Skólinn býður upp á alls konar tölvunámskeið frítt. Þetta eru yfirleitt hálfsdags námskeið sem taka á afmörkuðum atriðum sem nýtast manni bæði í náminu og öðru. T.d. er hægt að læra betur á Word, Exel, Powerpoint, Photoshop og fleira, þ.e. að nýta sér ýmsa möguleika sem þessi forrit bjóða upp á. En ég fór í morgun á námskeið sem kenndi undirstöðuatriðin í að skrifa html fyrir vefinn. Ég tók nefnilega að mér í vor að sjá um heimasíðu Brunatæknifélagsins án þess að hafa hundsvit á því hvað ég ætti að gera. Ég er búin að setja inn slatta af efni (síðan er óuppfærð síðastliðin tvö ár) en lenti svo í vandræðum með að halda áfram. Svo að núna fór ég á þriggja tíma námskeið í að skrifa html og get þ.a.l. kraflað mig aðeins meira áfram. Nú svo get ég skráð mig á áframhaldandi námskeið seinna ef ég vill. Ég á örugglega eftir að skoða þetta mikla úrval af námskeiðum seinna í vetur.

Það er þá best að fara að athuga hvort eittvað sem ég lærði í morgun kemur að notum við þetta rugl sem ég var komin í við heimasíðugerðina, kveðjur frá okkur Hildi til allra sem kíkja hingað inn!

Mmm, góður matur

2008-09-21T09:00:00.003Z

Við mæðgur fórum á "Farmers Market" niðri í bæ í gær. Ekki mjög stór markaður en athygliverður. Við keyptum okkur tvær nautasteikur, alveg svakalega flottar og fersk jarðaber og hindber. Þarna var líka hægt að kaupa heimabökuð brauð, alls konar kjöt- og fiskmeti, grænmeti, heimagerðar sápur og margt fleira.
Kvöldmaturinn í gær var því alveg dásamlegur. Þetta nautakjöt sem ég keypti var svo flott að meira að segja ég gat ekki eyðilagt það með eldamennsku, mmmmm!!!
Og með berjunum hafði ég sósu sem ég keypti líka á markaðnum, "Butterscotsch"! Hún er einhvers konar karamellusósa (heimatilbúin á einhverjum bænum) sem samanstendur af rjóma, sýrópi og brúnum sykri. Mér fannst hún eiginlega allt of sæt þegar ég smakkaði hana en hún er mjög passleg með ferskum berjum. Sem sagt, átveisla á laugardagskvöldi í West Powburn :)

Allt í rólegheitunum

2008-09-15T13:11:00.003Z

Síðasta vika og nýliðin helgi hafa liðið í mestu rólegheitum. Það eina sem ég hef afrekað fyrir utan hefðbundin heimilisstörf er að kaupa mér ný föt. Þeir sem þekkja mig vel vita að það er meiriháttar afrek! Ég þoli ekki að kaupa föt á sjálfa mig en það kemur víst alltaf að því að lokum að ekki verður lengur hjá því komist. Við Hildur fórum í verslunarleiðangur á laugardaginn og náði ég að kaupa mér eitt pils, tvo hlýraboli og tvo langermaboli. Áður var ég búin að kaupa mér eina skó svo mér finnst þetta bara heill hellingur :) Ég þarf að vísu að kíkja eftir buxum en þetta er sko nóg í bili, fresta því aðeins fram eftir haustinu.

Annars er bara ekkert að frétta, lífið er ljúft og skólinn byrjar bráðum!

Bið að heilsa heim....

Vísa

2008-09-10T06:26:00.001Z

Ég fékk þessa vísu senda frá Jóni Leví:

Varúð!

Víst það okkur sæmir sönnum

syndina helst vel að boða.

En varaðu þig á pilsamönnum

pínulítið samt að skoða.

Hálöndin

2008-09-09T10:28:00.011Z

Við mæðgur fórum í 12 tíma rútuferð upp í Hálöndin á sunnudaginn. Ferðin var alveg dásamleg okkur fannst æðislegt að fara út fyrir borgina og skoða okkur um úti í sveit. Eins og Hildur sagði, við erum svo mikið landsbyggðarpakk að okkur líður alltaf best úti á landi :)

Hér eru nokkrar myndir:

Ekki ólíkt íslensku heiðalandslagi...

Þetta er hann "Hamish" mjög frægt skoskt fjallanaut, ferlega flottur og kunni vel við athyglina sem hann fékk.

Umsjónarmaður hans var ekki síður athygliverður, ekta skoti ;) En hann var ekki eins hrifinn af athyglinni sem hann fékk. Það var samt frábært að sjá hvað þeir voru miklir félagar. Kallinn muldraði eitthvað við nautið og þeir virtust alveg skilja hvorn annan :)

Svo fórum við í siglingu um Loch Ness og leituðum að Nessie, vatnaskrímslinu fræga...

Þið megið giska á á hvorri myndinni skrímslið sést.....!!

Hérna sjást nokkrir bátar á leið upp í skipastigann í Fort Augustus

Fallegt í Fort Augustus við Loch Ness

Og að lokum kastalarústir, Urguhart Castle

Skrítinn draumur

2008-09-06T12:21:00.002Z

Ég hugsa nú ekki oft um merkingu drauma en stundum festist einn og einn svo í manni að hugsunin um hann fer ekki strax í burtu. Þannig var að mig hefur dreymt nokkurn vegin sama drauminn tvær nætur í röð. Kannski ekki alveg sama drauminn en hann var um nákvæmlega sama efnið. Í stuttu máli þá voru báðir draumarnir þannig að ég var að eignast son (nb. það kom aldrei fram að barnið ætti föður!) og ég var algerlega peningalaus. Ég átti ekkert fyrir barnið og var t.d. að senda tölvupóst á vini og vinnufélaga til að spurja hvort einhver gæti átt barnavagn í geymslunni sem hann gæti lánað mér. Ég var samt alveg í mínu mesta "sjálfstæðis-/þrjósku-attitudi" sem til er. Þ.e. ég þurfti í sjálfu sér enga hjálp (fannst mér) ég gat þetta allt saman sjálf. Var að spá í að fara í Góða Hirðinn og athuga með það sem vantaði fyrir barnið. Að auki (og þetta kom sterkt fram báðar næturnar) þá varð ég að nefna drenginn "Dagbjartur"!!! Ég vissi sjálf ekki hvers vegna en þetta var eitthvað sem sat fast í mér eins og ég gæti engu um þetta ráðið.

Venjulega vaknar maður bara eftir svona drauma og hristir hausinn og það gerði ég eftir fyrri nóttina. Hugsaði ekkert meira um þetta nema hvað mér fannst þetta ekki sérstaklega heillandi nafn (!). En að dreyma nákvæmlega það sama næstu nótt á eftir, það situr í mér.
Það eina sem ég veit um draumaráðningar er þessi setning: "böl er af ef barnið dreymir nema sveinbarn sé og þitt eigið". Þannig að þessir draumar hljóta að vera fyrir einhverju góðu og nafnið Dagbjartur getur ekki verið fyrir öðru en einhverju björtu og fallegu, haldið þið það ekki???

Ef einhver hefur einhverja hugmynd þá eru allar tillögur vel þegnar :)
Langaði bara að deila þessu með ykkur....

Flugeldatónleikar og nafnarugl

2008-09-01T09:10:00.005Z

Ég skrapp niður í bæ í gærkvöldi til að horfa á flugeldasýningu sem var skotið upp í takt við frábæra klassíska tónlist. Hildur nennti ekki með mér og var bara heima í rólegheitunum á meðan. En þetta var alveg frábært. Auðvitað voru flugeldarnir ekkert miklir miðað við það sem við Íslendingar erum vanir en að þeim skuli hafa verið skotið upp í takt við tónlistina var alveg frábært. Svo var útsýnið ekki af verri endanum þar sem kastalinn var í bakgrunni. Hérna er frétt um þetta.

Ég ruglaði aðeins saman "Addýjum" núna fyrir helgina. Fór að leita uppi bloggsíðu sem ég vissi um hjá gamalli skólasystir minni til að svara fyrirspurn í kommenti við síðustu færslu varðandi tölvna hennar Hildar :) Komst svo að því að það var ekki þessi Addý sem var að spurja heldur Addý Snigill!! Sorrý Snigla-Addý ég var ekkert búin að gleyma þér en heilinn hljóp bara aðeins hraðar en ég svo ég náði ekki að hugsa! Það er nefnilega þannig að ég þekki t.d. tvær Sóleyjar og að minnsta kosti tvær Siggur líka sem kommenta stundum hjá mér og ég er ekki alltaf alveg viss hver er hver.....!
En varðandi tölvuna hennar Hildar þá eru hérna linkar sem sýna hvað um er að ræða, við mæðgurnar tókum að vísu ekki eftir því að myndavélin í lokinu væri "optional" í þeirri bresku svo við fengum enga myndavél. Það skiptir ekki öllu máli, verðið er samt miklu lægra.
Sú íslenska og sú breska (það er sú sem er fyrst á listanum þarna).

Að lokum, stóra stelpan mín er að byrja í Háskóla Íslands í dag!!! Ó mæ.... hún er nú ekki nema 18 ára ennþá, verður 19 í desember, svo hún er örugglega með þeim yngstu þarna. En dugnaðurinn í þessari stelpu er engu líkur svo ég veit að hún klárar sig vel. Gangi þér vel í dag ástin mín!!!!

Bara smá update

2008-08-29T12:48:00.002Z

Það er lítið að frétta af okkur mæðgum í sjálfu sér. Lífið er farið að ganga sinn vanagang hérna í Edinborginni góðu og við höfum það mjög gott.
Ég hef verið að vinna svolítið á daginn, netið gerir það mögulegt að vinna eins og ég sé ennþá stödd á skrifstofunni í Kópavogi :) Ég er ekkert með mörg verkefni á minni könnu en er þó að reyna að klára tvö sem standa eftir.

Hildur var að kaupa sér tölvu. Hún er búin að sitja eins og ormur á gulli á fermingarpeningunum sínum síðan í apríl og nú var loksins komið að því. Það sem stelpan var orðin spennt :)
Hún keypti sér Dell Inspiron 1525 hjá Dell U.K. á netinu. Það tók um viku að fá hana senda heim að dyrum en það gerði nú ekkert til þar sem verðið á henni hérna er svo miklu lægra en heima að það var alveg biðarinnar virði. Við vorum s.s. búnar að skoða samskonar tölvu hjá EJS í Reykjavík, nákvæmleg eins, allt involsið og svoleiðis samsskonar og þar kostaði hún 109 þúsund krónur. Tölvan sem við keyptum hérna, (ath. einnig beint frá Dell...) kostaði a.á.m. 54 þúsund krónur!!! Finnst ykkur þetta hægt????? Ég bara spyr.....
Hildur er að sjálfsögðu ekkert smá glöð, átti allt í einu fullt af pening afgangs :)

Matarverðið hérna er líka lægra en heima en þó get ég ekki sagt að það sé svona rosalega mikill munur. Það er auðvitað eins hérna að maður hittir á sumt mjög ódýrt og annað dýrara. En það sem ég tek kannski helst eftir er verðið á ferskum kjúklingabringum og kalkúnabringum, það kostar ekki einn fót og hálfan handlegg eins og heima. Jú og svo lífrænær vörur og heilsuvörur, þær eru dýrari en hinar hérna eins og heima en samt ekki eins mikið dýrari og alveg viðráðanlegar. Þannig að það er í raun ódýrara að borða hollan mat hérna en heima. En vá hvað það er samt ráðandi óhollustan hérna í búðunum. Fleiri hillur af "crisps" (kartöfluflögum) í risaumbúðum og svo ég tali nú ekki um allar kökurnar og búðingana sem virðast vera stór hluti af daglegu fæði. Svo ég tali aftur um heilsufæðið, þá erum við íslendingar miklu framar í því að mörgu leiti. T.d. versla ég oftast í nokkuð stórri Sainsbury´s verslun, sem er svona nokkurs konar Hagkaup og þar eru heilsuvörur í hálfum hillurekka sem aftur á móti er mun meira bæði í Bónus og Krónunni heima. Ég fann t.d. ekkert spelt til að byrja með en fann svo bara grófmalað spelt í gær. Kepti það og svo einhverja mjölblöndu sem inniheldur ekkert hveiti og ætla að prófa að baka brauð úr þessu. Ég er nefnilega alveg orðið eins og Michelin-maðurinn af bjúg og ógeði eftir að hafa hakkað í mig venjulegt brauð og dót undanfarið.
Best að fara að baka og fara svo út í göngutúr, hérna er 17°C hiti og hálfskýjað, voðalega notalegt veður. Kveðjur heim í óveðrið ;) og góða helgi öll sömul.

p.s. takk fyrir allar góðu kveðjurnar í kommentunum það er svo gaman að sjá hvað að kíkja margir hérna inn og einmitt margir sem ég vissi ekkert að fylgdust með, æðislegt að "hitta" ykkur öll :)

Búin að finna draumastaðinn

2008-08-26T12:37:00.008Z

Við mæðgurnar skruppum aðeins út fyrir borgina á laugardaginn til að heimsækja "Deep Sea World" . Þetta safn er staðsett í litlu þorpi sem heitir North Queensferry og er staðsett undir gömlu járnbrautarbrúnni yfir The Firth of Forth.

Safnið var mjög skemmtilegt þó það hafi verið mun minna en við héldum miðað við auglýsingar. Hildur tók að sjálfsögðu fullt af myndum af fiskum og finnst mér, sem brunahönnuði, þessi ferlega skemmtileg. Þarna sjáið þið bara, fiskar þurfa líka að vita hvert þeir eiga að synda ef þeir eiga að rýma bygginguna skyndilega :)

Það sem mér fannst flottast í þessu safni var færiband sem fór með mann í gegnum gler-göng þar sem fiskar og hákarlar voru að synda allt í kringum mann. Hildur náði þessari mynd af einum hákarlinum þegar hann synti ofan á okkur:

og svo af þessari skötu sem er með svo skemmtilegt andlit :)

Eins og þeir sem þekkja mig vita, þá er ég mjög heilluð af stórum mannvirkjum og eru brýr þar fremstar í flokki. Þetta litla þorp er svo yndislegt og fallegt að ég væri alveg til í að setja að þar. Ímyndið ykkur, lítið friðsælt sveitaþorp við sjóinn með tvær stórar brýr í útsýninu!!! Sjáið bara:

Þarna sjáið þið nýrri brúna, bílabrúna

og þarna er gamla járnbrautarbrúin:

Þarna má svo sjá litla húsið sem ég ætla að búa í þegar ég verð gömul með öllum köttunum mínum. Mér er alveg sama hvort húsið ég fæ sko...

Hver er dásamleg?

2008-08-22T18:11:00.002Z

Ég talaði við ömmu í morgun fyrir leikinn því þegar svona keppnir eru í gangi þá verður maður að fylgjast með hvenær leikir eru og svoleiðis þó ég sé enginn íþrótta-unnandi , bara til þess að vita hvenær óhætt er að hringja í gömlu :)
Það er yndislegt að fylgjast með henni varðandi handboltalandsliðið, hún á í þeim hvert bein!

Sjá þessa frétt!

Fallegri verur

2008-08-22T09:50:00.004Z

Hildi gengur vel að aðlagast í nýja skólanum. Ein stelpan úr bekknum var fengin til þess að vera henni til aðstoðar fyrstu dagana og hefur Hildur fengið að vera með henni og hennar vinkonum í frímínútum og svoleiðis. Þannig að þetta lítur allt saman bara ágætlega út :)

En þar sem skepnurnar á síðustu myndum vöktu viðbjóð margra ætla ég að sýna ykkur þau dýr sem við skoðuðum líka í sömu ferð og eru mun fallegri og þokkafyllri. Gjörið svo vel:

West Powburn og fleira

2008-08-20T10:45:00.012Z

Jæja, Hildur er í skólanum í fyrsta skipi í dag. Við fórum í heimsókn í gær og fengum mjög góðar móttökur. Ég man að ég var með allt í hnút þega ég skildi hana eftir í fyrsta skipti á fyrsta skóladeginum hennar þegar hún var 6 ára en vá, ég var ekkert skárri í morgun! Það var ferlega skrítið að skilja hana eftir þarna í skólanum og labba í burtu :) En ég veit að hún spjarar sig vel stelpan.
Mér leist mjög vel á skólann í gær. Hann er frekar gamall og er í nokkrum byggingum sem hafa verið bætt við í gegnum árin. það eru um 1200 nemendur á 6 árum þarna. Hildur er á þriðja ári.

Eitt fengum við að vita í gær sem kom okkur á óvart, það eru engir skólabúningar í James Gillespie´s High School :) Hildur varð MJÖG glöð með það :)

Hérna eru svo nokkrar myndir eins og ég var búin að lofa:

Fyrsta kvöldmáltíðin á nýja heimilinu

Að komast á netið, þessar tvær myndir eru eiginlega teknar frá sama staðnum, bara í sitt hvora áttina.

Kósýkvöld með púslið okkar :)

Útsýnið úr stofuglugganum

Ég ekkert of ánægð með slönguna en lét mig samt hafa það ;)

Hildur var töluvert ánægðari með hana...

og hélt svo á þessu kvikindi líka.... það er óþarfi að taka það fram að ég kom ekki nálægt því !!!

Mikið djö... er ég klár :)

2008-08-17T14:03:00.002Z

Já, eins og ég hef alltaf sagt, ef maður hrósar sér ekki sjálfur hver gerir það þá??? hehehehe....
Við mæðgurnar höfum verið að keyra svolítið um undanfarna daga og ég er bara orðin nokkuð klár í þessu öfuga dæmi hérna. En ég mæli samt eindregið með því að ef þið ætlið að leigja bílaleigubíl í Bretlandi í fyrsta skipti, fáið ykkur sjálfskiptan. Það er nefnilega allt of erfitt að þurfa líka að muna eftir því að skipta um gír (með vinstri auðvitað) þegar maður er á fullu að mynna sjálfan sig á að vera réttu (-röngu) megin á götunni!!! Sem betur fer er Vauxhallinn sem ég er á voðalega þolinmóður við mig og tekur alveg af stað í öðrum gír, hann mótmælir a.á.m. ef ég reyni þriðja eða þaðan af hærra :)
Það sem ég er alltaf jafn hissa á líka, er að mér er að takast ágætlega að rata. Að vísu komst ég ekki alveg að ASDA superstore í gær en ég sá hana í fjarlægð.... við fórum bara aftur í Sainsbury's að kaupa í matinn eftir smá auka bíltúr :)

Í gær stóð ég líka við loforð mitt við Hildi um að halda á slöngu. Meira um það í næstu færslu ásamt myndum til að sanna mál mitt!

Á morgum skila ég svo bílnum og við Hildur förum að ganga frá skráningunni hennar í skólann. Ætli við fáum þá ekki upplýsingar um hvers konar skólabúnng við þurfum að kaupa og svoleiðis því að skólinn hennar byrjar á miðvikudaginn.

Í dag er bara leti og ljúft líf, biðjum að heilsa heim....

Nýja heimilið

2008-08-14T19:21:00.002Z

Hæ hæ allir saman,
ég vill byrja á því að þakka góðar kveðjur til okkar mæðgna :)
En við erum s.s. komnar heim til okkar í Edinborg og gekk ferðin bara vel. Við villtumst að vísu aðeins á leiðinni inn í borgina á bílaleigubílnum sem við tókum í Glasgow en vorum ekki villtar nema í ca. klukkutíma þá fundum við leiðina heim. En boy-oh-boy hvað ég var skítnervus að keyra öfugu megin á götunni!!!!
Leigusalarnir mínir eru yndisleg hjón sem tóku á móti okkur hérna. Þau voru búin að setja kaffi te og kex ásamt ávöxtum á borðið og mjólk og safa í ísskápinn. Það var sápa og pappír og allt sem þarf inni á klósetti. Rosalega "welcoming" móttökur. Svo eru þau öll af vilja gerð til þess að greiða götu okkar í hverju sem er.
Við vorum að vonum nokkuð þreyttar og fórum snemma að sofa en um nóttina vaknaði ég með hita og hálsbólgu og var gærdagurinn þess vegna ekki voðalega merkilegur. Það eina sem við gerðum fyrir utan að taka upp úr töskum var að skreppa út að versla í matinn og fá okkur skosk gsm-númer. Ég er öll betri í dag og við fórum þess vegna í smá túristaleik. Skruppum aðeins í miðbæinn og skoðuðum okkur um.

Hverfið okkar er voðalega fallegt og virkar rólegt.

Við biðjum að heilsa í bili, vonandi kemst ég fljótlega aftr inn á netið, það eru einhver vandræði með það hérna heima en ég hlýt að finna út úr því.

Túlílúúúú....

Komið að brottför - vonandi

2008-08-11T09:27:00.002Z

Jæja, það virðist vera komið aððí loksins, brottför er fyrirhuguð í fyrramálið. Það kemur að vísu í ljós þegar líða tekur á daginn hvort það borgi sig að fresta brottför um tvo daga eða svo eftir heilsufari Hildar. Við eyddum nefnilega gærdeginum á bráðamóttöku barna!!! Hildur vaknaði í gærmorgum með ofboðslegar kvalir og kastaði upp aftur og aftur vegna þeirra. Lýsingin var eins og í júní þegar við enduðum einnig á Barnaspítalanum og eftir þá ferð féll grunur helst á ristilkrampa. Ég brunaði með stelpuna niður á spítala í gær þar sem kvalirnar voru þvílíkar að ekki var um neitt annað að ræða en að fá sterk verkjalyf í æð og það strax! Úff, til að gera langa sögu stutta þá var hún aftur rannsökuð hátt og lágt en ekkert fannst og að lokum var ristillinn ennþá helst grunaður. Hún var útskrifuð í gærkvöldi þegar þetta var í rénum en eftir að heim kom hélt þetta aðeins áfram en við náðum að slá á verkina þá með töflum og svo náði hún að sofa vel í nótt. Ég ætla að halda áfram fram yfir hádegi að undirbúa það að fljúga út í fyrramálið en ef Hildur verður ennþá mjög slöpp og ekkert farin að borða eftir hádegið þá fresta ég auðvitað fluginu. Við byrjum svo bara á því þegar til Edinborgar verður komið að finna góðan lækni til þess að rannsaka stelpuna almennilega!!!

En að skemmtilegra málefni. Partýið á föstudagskvöldið var yndislegt, ekki svo margmennt en svakalega góðmennt! Magga, þú gleymdir að knúsa mig áður en þú stakkst af.....!!!
Takk fyrir kvöldið elskurnar og eins og ég sagði þarna um nóttina, ef einhverntíman er tími til að láta gamminn geysa og gera það sem maður vill, þá er það einmitt þegar maður er að fara að flytja burt af landinu í kjölfarið... hehehe.....!

Ég læt ykkur vita ef ég fresta fluginu en annars þá blogga ég næst þegar ég kemst í netsamband úti.

Túlilúúúú allesammen... :)

Kveðjupartýið!!

2008-08-07T11:52:00.003Z

Jæja, það er komið á hreint að kveðjupartýið verður haldið samhliða opnu húsi hjá Sniglunum á föstudagskvöldið (ath. breyttan dag!) í Sniglaheimilinu við Skerjafjörð. Barinn opnar kl.21 og verður hægt að kaupa þar áfengar og óáfengar veigar eitthvað fram á nótt.

Allir sem vilja þekkja mig, hvort sem þeir eru Sniglar eða ekki eru hjartanlega velkomnir!
Við skulum skemmta okkur saman þetta kvöld því að svo eruð þið laus við mig í rúmt ár á eftir hehehe...!

Ég treysti á að allt skemmtilega fólkið látið sjá sig og láti boðin berast áfram til þeirra sem vilja kannast við að þekkja mig en eru ekki tölvuvæddir eða ég ekki með símanúmerið þeirra í símanum mínum.

Sjáumst kát og hress...!

p.s. ef þið rekist á gaurinn á myndinni, endilega takið hann með! Ég hef alveg nokkur atriði í huga sem hægt væri að nota hann í............

Flutt

2008-08-05T10:15:00.002Z

Ég á bestu vini í heimi!!!
Ég hef ekki haft tíma til að blogga alla síðustu viku þar sem ég var að tæma íbúðina og mikið að gera í vinnunni. En síðasta þriðjudag fékk ég her fólks til að hjálpa mér að flytja. Anna Birna og Egill hennar, Jón Óli og Nonni Metall, Jói Bringa og Jóna og síðast en alls ekki síst Dagrún komu og hjálpuðu mér að koma dótinu mínu í geymsluna. Þau voru eitthvað efins um að allt kæmist fyrir enda kom það svo í ljós að þrátt fyrir mjög góða stöflun hjá henni Dagrúnu þá fékk sófinn minn og einn stóll að fara í Sniglaheimilið og ísskápurinn og sjónvarpið fór austur á Rauðalæk. Þegar karlpeningurinn var búinn að hjálpa til með að fara með dótið þá tóku þær valkyrjurnar til við þrif og kláruðu fyrir mig 2/3 af íbúðinni þarna um kvöldið. Takk fyrir alla hjálpina elskurnar mínar, þið eruð frábær!!!
Við Hildur tókum svo tarnir eftir vinnu á miðvikudag og fimmtudag til að klára að losa restarnar og þrífa út úr dyrum. Um miðnættið á fimmtudagskvöldið skellti ég svo í lás í Blönduhlíð 1 í síðasta skiptið.
Snemma á föstudagsmorguninn flugum við mæðgur svo til Ísafjarðar þar sem við áttum yndislega rólega og góða helgi. Hittum ömmur og afa og annað gott fólk og slökuðum vel á. Við erum svo með gistinu í Grýtubakka hjá foreldrum Dagrúnar fram að brottför.

Næstu dagar fara í alls konar lokafrágang vegna flutninganna auk þess sem ég þarf að klára nokkur verkefni í vinnunni.

Það lítur út fyrir að partýið á laugardaginn verði haldið samhliða bjórkvöldi hjá Sniglunum í Sniglaheimilinu en ég á aðeins eftir að staðfesta það svo læt ég dygga lesendur mína vita :)

Kveðjupartý!!!

2008-07-25T09:02:00.004Z

Vegna mikilla áskoranna þá stefni ég að því að halda kveðjupartý laugardaginn 9.ágúst! Staðsetning er ekki alveg komin á hreint en verið er að athuga með húsnæði ÓÓ og læt ég fólk vita nánar þegar það er komið á hreint.

Alla vegana, takið frá þetta laugardagskvöld, allir sem vilja þekkja mig og skemmtum okkur duglega saman.

Svo eruð þið laus við mig í heilt ár... hehehe!

Eitt í viðbót: við Hildur verðum með bás á kompudögum í Kolaportinu um helgina, bæði laugardag og sunnudag, endilega kíkið á okkur :)

Brúðkaup og fleira

2008-07-21T17:10:00.003Z

Ég fór í brúðkaup til frænku minnar á laugardaginn. Ótrúlegt þegar "litlu" frændsystkini manns eru farin að gifta sig! Ég er nefnilega í yngri kantinum á eldri hópi barnabarna bæði hjá föður- og móðurfjölskyldunni. Svo kemur smá bil í aldri og svo aftur yngri hópur frændsystkina. Núna eru s.s. þessi "litlu" frændsystkini allt í einu orðin stór. Þau eru farin að eignast börn, útskrifast með alls konar menntun og gifta sig. Ferlega skrítið þar sem það er svo stutt síðan ég var næstum fullorðin og þau þá bara lítil, núna er ég ennþá "næstum fullorðin" og þau bara búin að ná mér....! hehehe... það er ekki eins og ég eldist jafn mikið og þau... ;)

En að helginni, þá var voðalega fallegt brúðkaup í lítilli sætri sveitakirkju á suðurlandi og veislan haldin í gamla fjósinu á Brekkum (n.b. það er búið að gera þar hinn fínasta veislusal).
Það er alltaf jafn gaman að hitta fólkið mitt fyrir austan. Þvílíkt hresst og skemmtilegt lið. Það var bara verst að ég gat ekki verið fram á sunnudag og þ.a.l. gat ég ekki fengið mér í glas og djammað svolítið með þeim. En þegar mikið er að gera þá verður eitthvað undan að láta.
Sem sagt, fallegur dagur í sveitinni með frábæru fólki :)

Við Hildur réðumst svo í hið ógurlega verkefni að byrja að taka til í geymslunni á sunnudaginn. Þetta er að sjálfsögðu ekki eins dags verk svo það verður haldið áfram á kvöldin í vikunni. En... hálfnað verk þá hafið er...!

Þetta smá þokast

2008-07-15T09:59:00.002Z

Jæja nú er ég búin að kaupa farmiðana fyrir okkur Hildi til Skotlands svo það er loksins komin föst dagsetning á brottför. Við förum út 12.ágúst eins og stefnt var að.
Tiltekt, sortering og pökkun gengur heldur hægt en þokast þó. Mikið andsk.. er þetta leiðinlegt!
Það er líka svo mikið að gera núna í sumar bara í því að vera mótorhjólapakk, alltaf eitthvað skemmtilegt um að vera helgi eftir helgi. Ég má bara ekkert vera að því að tæma íbúðina og svoleiðis :(
Við Hildur skruppum í heimsókn á "Potato Run" í Þykkvabænum á laugardaginn og þar sem ég var búin að ákveða að fara á hjólinu þá gerði ég það auðvitað! Datt ekki í hug að taka skynsemina á þetta og fara á bílnum vegna veðurs, nei nei, skynsemin var bara sett inn í skáp og purrað af stað. Ég hafði tekið farþegabakið (íslensk þýðing á "sissybar") af hjólinu hennar Jónu og sett á hjá mér svo ég gæti tekið Hildi með mér og Einar var búinn að finna fyrir mig farþegapedalana sem hafði vantað. Okkur mæðgum var því ekkert að vanbúnaði. Dúðuðum okkur í gallana, Hildur greyið sett í nokkrar peysur og svo í leðurgallann minn og svo af stað.
Ég held svona í fyllstu alvöru að einhverju æðra valdi hafi fundist þetta voða fyndið og ákveðið að leggja fyrir mig smá hjólapróf. Í fyrsta lagi þá var svo mikil rigning að maður þurfti að sæta lagi til að anda að sér ef maður ætlaði ekki að drukkna. Í öðru lagi ákvað lognið að flýta sér heldur hressilega á Hellisheiðinni. Í þriðja lagi þá var þokan þarna uppi svo þétt (til að auka við lélega skyggnið vegna rigningarinnar) að ég sá aldrei nema ca. 2 stikur fram á veginn og svo eins og ég hefði ekki nóg að gera við að halda hjólinu uppréttu og á réttum vegarhelmingi, þá er þarna á heiðinni dágóður kafli af svona líka stíf-póleruðu nýlögðu malbiki. Það þarf ekki að taka fram hversu sleypt það er í bleytu!!!
Úff, ég verð að viðurkenna að ég var ansi stíf í öllum skrokknum eftir þetta. Það er nógu stressandi að vera að berjast við vindinn svona venjulega en eiginlega ennþá verra ef maður er með barnið sitt aftaná.
En í Oddspart komumst við, gegndrepa og kaldar. Þar var slatti af fólki þrátt fyrir veðrið. Við ílengdumst þar fram eftir kvöldi við át, leiki og spjall og héldum svo heim á leið um miðnættið. Hildur var svo heppin að fá far með Indu og Badda í bæinn, henni leist ekkert á að fara að klæða sig aftur í hálf-þvalann leðurgallann og frjósa aftaná hjólinu. Mín föt voru a.á.m. orðin þurr og ferðin heim gekk bara vel.
Sunnudagurinn fór svo í tiltekt og pökkun.. jei gaman gaman!

Dásamleg helgi - frábært fólk

2008-07-08T12:59:00.003Z

Landsmót stóð eins og venjulega alveg fyrir sínu. Þvílíkt dásemdar lið sem maður þekkir, bæði þeir sem maður þekki nokkuð vel og svo allir hinir sem maður er málkunnugur. Þið eruð sko bara frábær öll sömul og takk fyrir helgina!!!

Ég er "IN LOVE" eftir þessa helgi!!! Nei nei, það er ekkert brúðkaup í vændum strax því þetta samband þarf að þróast í nokkur ár áður en við getum loksins verið saman. Ég á ekki mynd af viðkomandi núna en fann á netinu eina sem ég er búin að prenta út og pinna á töfluna hjá mér til svo ég geti horft dreymandi augum á hana þegar ég á að vera að vinna, sjáið þið bara dýrgripinn:

Harley Davidson Heritage Softtail!! Ég var látin máta svona hjól á landsmótinu og ég bara endurtek orð mín hérna að ofan "I'm in love!" ég ætla að eignast svona hjól einhvern tíman!!

Ferðalagið sem breyttist aðeins

2008-06-30T16:30:00.001Z

Ég var í fríi í síðustu viku og ætluðum við Dagrún í hjólaferð á austulandið. En við breyttum því aðeins og voru nokkrir samverkandi þættir sem urðu til þess. Í staðinn þá fór ég í Þykkvabæinn og hjálpaði Dagrúnu svolítið og hún hjálpaði mér á móti að stússast í hjólinu sem Einar var að lána mér. Já, ég er komin á Harley!! Mér finnst þetta stórt og þungt hjól þegar ég sit á því en þegar það stóð við hlið margra annarra hjóla um helgina þá virkaði það alls ekkert stórt!! Hmmm, ætli það geti stafað af því að ég sé bara svona lítil og vön léttu og meðfærilegu hjóli? Ja, mér er spurn...
Allavega, þá er ég síðan ég bloggaði síðast búin að hjóla á hálf-bremslulausum sportster austur í Þykkvabæ og aðeins meira, vinna í byggingarvinnu, pússa og bóna nýju græjuna og fara á afmælistmót hjá Óskabörnum Óðins. S.s. frábær vika :)

Landsmót bifhjólafólks er svo framundan um næstu helgi og þangað til brjálað að gera í vinnunni.
Reyni samt að blogga aðeins meira um skemmtilegheitin um síðustu helgi áður en skemmtilegheitin byrja aftur um næstu helgi :)

Bless till later....

Afhverju ...

2008-06-18T15:11:00.002Z

... gerir maður ekki það sem er manni fyrir bestu?? Alveg er það ótrúlegt, finnst ykkur ekki?
Ég fékk eitt sinn mjög góðar leiðbeiningar um mataræðið ásamt því að ég fékk lyf til að hjálpa mér að ná almennri heilsu, hjá henni Kollu grasalækni hérna um árið. Ég var mjög dugleg að fara eftir öllum hennar ráðum í nokkra mánuði og svo fór að fjara undan dugnaðinum. Ég hef samt ekki alveg farið til baka í það sem fer illa í mig þangað til núna undanfarið að ég hef gersamlega dottið í það...! Vitandi vel hvaða afleiðingar það hefur þá hélt ég samt áfram í skyndibita og tilbúninni fæðu. Enda fékk ég það í bakið svo ekki sé meira sagt. Er komin með endalausan niðurgang og magaverki eins og ég var áður en ég byrjaði fyrst á þessum breytingum og er að auki alveg eins og vel fyllt vatnsblaðra af öllum bjúgnum sem er í skrokknum á mér. Þegar ég vakna á morgnana get ég varla kreppt hnefana af bjúg.
Þetta er ótrúlegt af mannskepnunni að geta ekki haldið sig við það sem er henni fyrir bestu, sérstaklega þar sem ég er búin að prófa að hitt virkar í alvöru og mér leið svo ofboðslega vel.

Jæja, það batnar svosem ekkert við það að berja á sjálfri sér, nú er bara að taka mataræðið föstum tökum og vera dugleg að laga það sem ég er búin að skemma.

Flutningavesen formlega hafið

2008-06-12T11:04:00.002Z

Frá og með þessari viku verður íbúðin mín hálf lömuð vegna fyrirhugaðra flutninga. Það er kannski full mikið að vera í tvo mánuði að pakka og flytja en þannig er að Ólöf er að fara í mánaðar Interrail um í byrjun júlí og þarf að vera búin að flytja sig heim til Rúts áður en hún fer. Við Hildur gerum svo ráð fyrir að tæma íbúðina í lok júlí.
Fyrsti í flutningum var því núna í vikunni þegar Ólöf fékk bókahillurnar mínar úr stofunni. Þar með neyddist ég til að byrja að sortera og pakka því sem í þeim var. Ég ætla að vera svo dugleg að henda/selja/gefa þannig að núna er svaka flokkunarkerfi í gangi heima. Ja kannski ekki svaka kerfi en sumt fer til Ólafar, annað fer til Edinborgar með okkur Hildi, sumt fer í geymslu og restin fer á kompudaga í Kolaportinu og það sem ekki hverfur þar fer beint í Góða Hirðinn. Flott plan ekki satt??
Þar sem Ólöf fær líka lánaðan fataskápinn minn þá er næst á dagskrá að tæma hann. Vá hvað flokkunarkerfið verður þokkalega notað þar!! Er samt mest hrædd um að minnsti hlutinn fái að fara með út og stærsti hlutinn fer líklega í flokkinn sem ég gleymdi að telja upp hér að ofan - ruslið! Ástandið inni í þessum skáp er nefnilega orðið heldur dapurlegt, þarf kannski að reyna að þróa með mér ástríðu til þess að kaupa mér föt...!

Ó, er næstum að gleyma aðal fréttunum - ég seldi hjólið á laugardaginn!! :) Var bara sátt við það sem ég fékk fyrir það, hafði sett mér lágmark og fékk það. Núna er svo bara að ýta og ýta á Einar að koma Hallanum á götuna fyrir mig. Einar Marlboro ætlar s.s. að lána mér einn Harley sportster þangað til ég fer út, þessi elska :) Við Dagrún ætlum svo í viku ferðalag á hjólunum núna í lok júní.

Bless þar til næst...

Long time-no blog

2008-06-04T11:26:00.002Z

Já ég veit, ég hef ekki sett neitt hérna inn í rúma viku. Ég ætlaði alltaf að setja inn mynd af nýstúdentinum mínum hérna í síðustu viku en komst aldrei til þess. Svo þegar ég loksins ætlaði að taka myndirnar úr myndavélinni þá hafði Hildur verið búin að því og myndirnar eru allar á tölvunni heima. Ég fer a.á.m. eiginlega aldrei í þá tölvu heldur geri allt tölvutengt í vinnunni svo þannig er nú það. Set inn mynd seinna.

Nýjustu fréttirnar af heimilinu eru þær að Depill er kominn með nýtt heimili. Hann fékk æðislegt heimili með hjálp www.dyrahjalp.org og ef hann hefði fengið að velja þá hefði þetta einmitt verið staðurinn sem hann hefði valið. Hann fór á sveitabæ rétt hjá Akureyri þar sem hann fær að hlaupa um víðan völl allan daginn og leika sér við tveggja ára gamlan Labrador. Auðvitað var svolítið erfitt að láta hann frá sér, sérstaklega fyrir Hildi en það var gott að hann fékk svona góðan stað til að vera á. Nú er allavega eitt mál úr sögunni og ég get einbeitt mér að því að leysa þau næstu :)

Næsta mál sem ég þarf virkilega að leysa er að selja hjólið mitt! Ég er löngu búin að lofa bankanum mínum andvirði þess og rúmlega það.

Annars er undirbúningur fyrir flutninginn á fullu og bara allt að gerast.

bless þar til seinna, er farin í klippingu og svo með stelpurnar í myndatöku, fermingar- og stúdents...

Allt að gerast hjá okkur mæðgunum!!

2008-05-22T11:14:00.002Z

Já það er sko ekki lognmollan í kringum okkur mæðgurnar þessa dagana. Ferminginn hennar Hildar nýafstaðin og nú útskrifast Ólöf sem stúdent á morgun. Hún vill ekki halda neina veislu af þessu tilefni en við ætlum að fara saman út að borða ásamt mömmu og valdi Ólöf Austur Indíafélagið til að fara á. Ég er svo stolt af þessari duglegu stelpu minni sem er að taka stúdentinn á 3 árum algerlega á eigin hörku. Með brjálaðri vinnu, þar sem hún var að taka auka áfanga á hverri önn ásamt því að vinna helling með á Fjörukránni. Ég vildi að ég hefði þó ekki væri nema brot af þessum dugnaði hennar.

Svo voru mér að berast góðar fréttir. Ég er búin að fá að vita að ég kemst inn í skólann úti í Edinborg næsta vetur!!! JEIIII... ! þó ég hafi verið nokkuð örugg um að komast inn þá er maður ekki 100% öruggur fyrr en skólinn staðfestir. Núna getur því undirbúningur farið í fullan gang :)

Það er því bara fögnuður á mínu heimili þessa dagana!

Kvennareið í Þykkvabæinn

2008-05-19T12:57:00.003Z

Hvað segið þið hjólastelpur sem villist hingað inn, eigum við að skella okkur í kvennareið til bóndans í Þykkvabænum annað kvöld? Þ.e. þriðjudagskvöldið 20. maí.

Við Inda erum að skoða málið og skipuleggja, við förum allavega tvær svo framarlega sem ekki rignir eldi og brennisteini. Vona bara að ég fái ný kerti í hjólið mitt í dag :)

Frestað!!!

Ógeðsleg skrímsli

2008-05-09T11:42:00.002Z

Eins og eflaust mörgum öðrun, eru mér ofarlega í huga allar þessar fréttir undanfarið um barnaníðinga og kynferðisglæpamenn, bæði hérlendis og erlendis. Hvað í ósköpunum er það sem gerist í mannshuganum hjá svona mönnum? Sem betur fer getum við fæst okkar ímyndað okkur það.
Því miður þá kannast ég við háskólaprófessorinn sem handtekinn var núna um daginn vegna svona máls. Ég vann með honum í ákveðinni nefnd og ég get sagt ykkur það að þessi maður er langt í frá í lagi svona dags-daglega. Það var eitthvað við hann, allt í hans fari, sem lét mann fá óþægilegan hroll.. brrrr! Þvílíkt creepy gaur! Mikið er gott að upp um hann komst svo fjölskylda og aðrir þolendur geti hafið bataferli sem á eftir að taka allt þeirra líf hér eftir.
Annað íslenskt mál sem hefur verið í fréttum undanfarna daga er presturinn frægi. Ég ætla sem minnst að tjá mig um það opinberlega annað en það að þetta er ekki í fyrsta skiptið sem svona sakir eru bornar á þennan mann. Ég man sjálf eftir því hvernig hann lét við mig og vinkonu mína sem var í spilatímum hjá honum þegar við vorum 9 ára, lét okkur setjast á lærin á sér og tók utan um okkur og svoleiðis...ojj bara þessi maður er ekki alveg í lagi og hefur aldrei verið!
Svo er það þetta óhugnanlega mál í Austurríki. Úff, það fer nú bara út fyrir öll mörk. Þetta er eitthvað sem maður getur ekki ímyndað sér og áhrifin eiga eftir að fylgja allri fjölskyldunni alla æfi. Ótrúlegt hvað svona hroka-karlpungar geta gert!
Það skapaðist umræða um þetta í kaffitímanum í vinnunni í morgun og þar komu fram ágætis hugmyndir að refsingum fyrir þessa tegund mannapa:
a)binda þessi ógeð í gapastokk með allt niður um sig og hafa þá staðsetta þar sem aðrir perrar geta bara gengið í þá og fengið sér einn stuttan þegar þeim sýnist...
b)setja þá inn á opna fangelsisdeild þar og láta samfanga þeirra hafa greiðan aðgang að þeim...
c)tengja rafstraum við punginn á þeim og leifa gestum og gangandi að ýta á takkann í tíma og ótíma...

Mér líst vel á öll þessi atriði, kannski væri bara flottast að sameina þau öll fyrir þá allra ógeðslegustu? Ja maður spyr sig.....

Og þá þetta próf líka...

2008-05-05T12:59:00.001Z

You Are Kermit

Hi, ho! Lovable and friendly, you get along well with everyone you know.

You're a big thinker, and sometimes you over think life's problems.

Don't worry - everyone know's it's not easy being green.

Just remember, time's fun when you're having flies!

The Muppet Personality Test

Hvað segir smekkur minn á súkkulaði um mig?

2008-05-05T10:48:00.003Z

Ja ég veit ekki hvort þetta er allt saman satt, allavega ekki þetta með að mér líki illa að vera ein, það er eiginlega alveg á öndverðu meiði við mig :)

What Your Taste in Chocolate Says About You

You are unique, creative, and fascinating.

You don't do what's expected of you.

You go for what's unknown and uncharted.

You are passionate and full of life.

You fall in love easily, and you tend to have whirlwind relationships.

Your passion sometimes does get the better of you. You have a crazy temper!

You love being around people. Friendships are important to you.

You feel lost when you're by yourself... so you tend to avoid being alone.

The Chocolate Oracle

Búin að ferma

2008-04-28T14:56:00.002Z

Jæja þá er ég búin að ferma yngri dótturina. Dagurinn í gær var yndislegur í alla staði. Veðrið fallegt þrátt fyrir smá kulda og allt gekk eins og í sögu. Athöfnin var mjög skemmtileg og gekk atriðið okkar Hildar fínt. Ég er svo heppin að eiga góða að, bæði fjölskyldu og vini sem hjálpuðu okkur mæðgunum að gera daginn eftirmynnilegan. Takk takk fyrir alla hjálpina, þið eruð æðisleg!

Hildur er mjög ánægð með daginn, bæði athöfnina, veisluna og allar gjafirnar :) Hún var stórglæsileg í upphlutnum sem ég saumaði á hana og það er ekki laust við að mamman hafi verið að farast úr stolti yfir báðum ungunum sínum, sniff - sniff, smá væmni leyfileg núna...!

Svona vorum við mamma og Hildur fínar í Háskólabíói í gær:

Dimmitering og ferming

2008-04-23T14:39:00.003Z

Ólöf er bleikur kærleiksbjörn í dag. Ég var því miður ekki með neina nothæfa myndavél heima í morgun þegar hún fór út að dimmitera en því líkt krútt sem hún var í bleika mjúka kærleiksbjarnarbúningnum sínum :) set bara inn gúglaða mynd af svoleiðis bangsa í staðinn:

Hún var einmitt líka með svona regnboga á maganum :) Mér þykir verst hvað búningurinn er lítill, ég get alls ekki stolið honum til að taka með á landsmót í sumar!!!

Við Hildur erum í rólegheitunum að undirbúa ferminguna á sunnudaginn. Allt að verða tilbúið með góðri hjálp frá Dísu, mömmu og Dagrúnu. Ég er ekkert að fara á hvolf yfir þessu en það er samt í mörg horn að líta.

Jæja, ég er farin út að mótmæla... neee, ég er svoddan vesalingur að ég læt aðra um það fyrir mig ;)

Gleðilegt sumar öll sömul og takk fyrir veturinn!!

Þetta er ekki alveg í lagi

2008-04-18T09:50:00.003Z

Smá svona neytendablogg hérna...
Ég fór í apótek í gær til að kaupa sjóveikistöflur fyrir hann pabba minn, sem er í sjálfu sér ekki í frásögur færandi nema hvað mér blöskraði verðmunurinn á milli apóteka. Fyrst fór ég í Lyf og Heilsu í Austurveri, þar var bara til einn pakki af "Postafen" með 10 töflum og kostaði hann 454 kr. En þar sem kallinn ætlar að vera á sjó í a.m.k. 6 daga og hver tafla virkar í ca. 12 klst. þá vildi ég fá annan pakka. Ég þurfti því að fara í aðra lyfjabúð og fór í Lyfju í Lágmúla. Þar kostaði samskonar pakki 365 kr eða u.þ.b. 20% minna!!! Hvernig stendur á þessu?
Ég veit vel að þessi krónumunur kemur ekki til með að breyta neinu í heimilisfjármálunum en ég tek alltaf sérstaklega eftir verðmuni á svona lágum tölum vegna þess að þá er prósentutalan svo hrikalega há. Margt smátt gerir eitt stórt - svo - fylgjumst vel með verði og látum ekki bjóða okkur svona fíflaskap!!!

Tónlistarsnillingurinn ég.. eða þannig sko

2008-04-16T09:04:00.003Z

Lífið gengur sinn vanagang og það styttist í ferminguna. Ég er voða róleg yfir þessu tilstandi enda er þetta ekki mikið mál ef maður velur að standa þannig að hlutunum. Það helsta sem ég þarf að hafa áhyggjur af er sú staðreynd að Hildur ætlar að spila á flautuna í fermingarathöfninni og ég ætla að spila undir á píanó! Sko ég hef engar áhyggjur af stelpunni, hún stendur sig með prýði en ég.... úff, ég hef ekki spilað á píanóið í þónokkur ár og hvað þá komið fram einhvers staðar!! Hvað er þá gáfulegra en að taka þetta bara með trompi og koma fram í stóra salnum í Háskólabíói? Ja ég bara spyr!! Vona bara að ég verði stelpunni minni ekki til skammar....
Held samt að við verðum bara flottar mæðgurnar báðar í upphlut :)

Edinborg - allt að gerast

2008-04-11T12:42:00.002Z

Þó ég sé ekki búin að fá staðfestingu á inngöngu í skólann úti í Edinborg þá er ég búin að fá íbúð þar :) Fyrir algera tilviljun þá fór af stað svona "maður þekkir mann" atburðarrás sem varð til þess að við Hildur erum komnar með fína þriggja herbergja íbúð með húsgögnum og öllum húsbúnaði, í u.þ.b. 10 mínútna göngufjarlægð frá skólanum mínum. Ég er búin að vera í e-mail sambandi við hjónin sem eiga íbúðina og líst svakalega vel á. Það er enginn smá munur að vera komin með þetta á hreint áður en maður fer út. Þá get ég verið búin að skrá Hildi í réttan skóla og svo er bara að pakka saman fötunum sínum og fara...! Oooo, ég er farin að hlakka svo til...!!! Get varla beðið fram í ágúst!
Svo er bara eins gott að ég komist inn í skólann, annars skríð ég ofaní næstu holu og verð þar næsta árið :)

Hundspottið mitt fékk næstum því nýja fjölskyldu um daginn, var hjá þeim um páskana og svo ákváðu þau að prófa aðeins áfram. En þar sem þau eru með 3 hress börn þá passaði einn "ofur-hress" hundur enganveginn inn í heimilishaldið. Þeim þótti samt ósköp vænt um hann og hann hafði það svakalega gott hjá þeim en hafði ekki vit á því að haga sér skikkanlega svo hann fengi þarna framtíðarheimili. Hann er svo mikill asni greyið!!!

Jæja, helgin framundan og ég nenni ekki norður í afmælið hans Jóa Rækju. Þarf að gera svo mikið heima og að vinna líka svo ég ætla að eyða helginni í bænum. Gangið hægt um gleðinnar dyr og njótið helgarinnar.

Kartöfluball og mótorhjól

2008-04-07T17:47:00.002Z

Hið árlega kartöfluball var haldið í Þykkvabænum á laugardaginn. Ég fór austur á föstudagskvöldið og notaði laugardaginn til að pússa hjólið mitt og gera það fínt. Það varð líka til þess að ég mætti með svakalega fínt "manicure" á ballið ;) Hvaða maður getur staðist konu með þessar líka fínu olíurendur undir nöglunum??? Ja ég bara spyr...!
Maturinn var alveg frábær, kartöfluréttir í tugatali og ekki skemmdi félagsskapurinn. Okkur Einar Marlboro lenti aðeins saman (aðallega í gríni samt) sem varð til þess að eftir að hann hafði eitrað fyrir mér með vodka þá gat ég ekki drukkið meira og var því bara stillt og edrú :) Það er ekki alveg hægt að segja það sama um alla aðra (nefni engin nöfn) en aumingja Dagrún sem var búin að standa í undirbúningi og eldamennsku í marga daga og svo í því að taka af borðum og vaska upp á ballinu, þegar hún loksins komst til þess að skemmta sér þá var klukkan um 2 og allir hennar félagar, þessir líka partý-bikerar, farnir heim að sofa :) Þvílíkt sukk - lið eða hitt þó heldur... enda kom hún líka heim í Oddspart þegar ballið var búið og vakti okkur með offorsi og skipaði fólki út úr rúmunum og niður í partý!!! Ég held bara að einhvern tíman hafi maður nú verið hressari í skemmtanadæminu heldur en akkurat þarna. Við verðum bara að reyna betur næst....!
Á sunnudaginn kláraði ég svo að sjæna hjólið og hjólaði svo í bæjinn. Nú er bara að reyna að selja gripinn þannig að ef einhver veit um byrjanda á hjóli þá er ég með akkurat rétta hjólið, alveg frábærlega lipurt og þægilegt þó gamalt sé.

Að lokum ætla ég að byrta niðurstöður úr strumpaprófi sem ég tók. Ég hef alltaf haft mikla trú á lífsgildum þessara bláu vera og auðvitað tekur maður svona niðurstöður mjög alvarlega ;)

Lífið og dauðinn

2008-04-04T09:06:00.002Z

Enn einu sinni kemst maður að því hvað lífið er brygðult og hvað dauðinn getur verið ósanngjarn. Ég tek undir með stóru systir sem hún skrifaði á síðunni sinni, hvernig stendur á því að fólk í fullu fjöri er hrifsað frá okkur á meðan þeir sem saddir eru lífdaga og tilbúnir til þess að kveðja sitja og bíða? Ein uppáhalds frænka mín var að missa manninn sinn af slysförum og erum við öll mjög slegin. Það er rétt tæpur mánuður síðan hún fylgdi elskulegum föður sínum til grafar sem dó líka frekar skyndilega. Það er ekki í lagi að leggja svona miklar raunir á eina góða konu ég segi það bara alveg eins og er :(

Hvíl í friði kæri Flosi, við reynum eins og við getum að styðja við Siggu og strákana þína.

Veikindi

2008-03-31T19:40:00.002Z

Ég er búin að vera svo hund-veik síðan á miðvikudag í síðustu viku að ég hef ekki sest við tölvu fyrr en núna. Blogga meira seinna, t.d. um páskaferðina vestur og svoleiðis en vildi bara aðeins láta vita af því að ég er ekki alveg dauð!

Heyrumst brátt aftur...

Stundum fer ég vestur

2008-03-18T09:07:00.003Z

Síðasta helgi var afskaplega falleg. Jónas afi var jarðaður á laugardaginn frá Árbæjarkirkju rétt hjá Hellu og skartaði sveitin hans sínu fegursta þann daginn. Sólin skein í kuldanum og útsýnið var alveg dásamlegt. Athöfnin var virkilega falleg, mikið sungið af fallegum ættjarðarlögum og sálmum enda hafði afi mikið yndi af söng. Ég held að allir hafi bara verið voðalega sáttir eftir þennan fallega dag. Amma komst því miður ekki austur í jarðaförina þar sem hún er rúmföst á landsspítalanum en Helena frænka mín var svo yndisleg að sitja hjá henni og hjálpa henni við að fylgjast með athöfninni í gegnum síma.

Við Dísa systir fengum að gista í Oddsparti og var Ebba litla voðalega sæl og glöð þar. Takk fyrir okkur Dagrún :)

Nú er svo komið að páskaferð til Ísó og er fyrirsögnin á þessari bl0ggfærslu í tilefni þess. Þar sem heiti tónlistarhátíðarinnar fyrir vestan um páskana er "aldrei fór ég suður" en það á ekki við hjá mér þar sem ég fór jú suður og m.a.s. ílengdist þar :) En á morgun ætlum við s.s. að aka vestur og ætlar Dagrún að koma með okkur. Björk bróðurdóttir mín á að fermast á skírdag og ætlum við Dísa að gista á Góustöðum með fjölskyldur okkar.
Sem sagt, framundan er fermingarveisla, tónlistarveisla og fullt af ömmu og afa - hittingi :)

Hafið það gott um páskana öll sömul og passið ykkur á ofáti (er ekki viss um að ég geti það sko...)

p.s. Elsku Inda og Magga, innilega til hamingju með fermingarbörnin ykkar um síðustu helgi!!

Sorg

2008-03-07T12:18:00.002Z

Hann Jónas afi er dáinn. Hann varð bráðkvaddur í fyrrinótt heima hjá sér.
Eins og ég sagði í síðustu viku hérna þá voru ömmur mínar ótrúlegu báðar hætt komnar í aðgerðum og nú eru þær báðar á hægum batavegi. Alla, móðuramma mín, fór í stóra kviðarholsaðgerð fyrir viku síðan sem var hreinlega upp á líf og dauða. Allir voru búnir undir það að þetta gæti farið á báða vegu. Hún lét ekkert segja sér það og vaknaði eftir aðgerðina ákveðin í því að ná sér. En á meðan hún lá á Landspítalanum að jafna sig þá dó maðurinn hennar, hann Jónas afi. Hann var ekki heilsuheill eða eins og hann sjálfur sagði þá var skrokkurinn alveg búinn. En kannski vegna þess að hann var alltaf svo hress í anda og alltaf að hjálpa ömmu og hugsa um hana, þá kom þetta svo flatt upp á alla.
Þau afi og amma voru gift í um 60 ár og voru mjög samrýnd. Afi var í raun stjúp-afi minn en aldrei fundum við systikinin neinn mun á því hvort hann ætti í okkur einhvern blóðdropa, hann átti okkur öll barnabörnin jafnt. Jónas afi var einn besti maður sem ég hef kynnst og hans skarð verður ekki fyllt. Ég ætla að láta allar góðu minningarnar um hann hjálpa mér í gegnum næstu daga og vikur sem verða erfiðar. Sérstaklega erfiðar fyrir ömmu sem misst hefur svo mikið einmitt núna þegar hún hefði þurft á öllum sínum styrk að halda til þess að ná heilsunni eins vel og hægt er.

Elsku besti Jónas afi, þakka þér fyrir að hafa verið í lífi okkar mæðgnanna og takk fyrir að vera eins einstakur maður og þú varst. Hvíl í friði.

Vill ekki einhver eiga mig??

2008-03-04T09:41:00.002Z

Föstudagur - einu sinni enn!

2008-02-29T08:55:00.003Z

Það er ótrúlegt hvað tíminn líður hratt ("á gervihnattaöölld..."). Vikurnar eru rétt byrjaðar þegar þær eru bara búnar.

Ég verð aðeins að hafa orð á því hérna hvað ég á ótrúlega sterkar ömmur, já og afa auðvitað líka þó það hafi ekki reynt eins mikið á þá blessaða undanfarið eins og ömmurnar.
Í síðustu viku veiktist Martha, föðuramma mín. Var í framhaldinu flutt hingað til Reykjavíkur þar sem hún fór í uppskurð. Þetta var töluvert alvarlegt en hún vaknaði eftir uppskurðinn ótrúlega hress og þegar ég sá hana tveimur dögum seinna leit hún ótrúlega vel út og var á hröðum batavegi. Þess má geta að hún er 91 árs gömul og ég held að það sé ekkert voðalega sjálfsagt mál að fólk á þeim aldri "skreppi" svona í stórar aðgerðir eins og ekkert sé!
En í fyrradag þá veiktist önnur amma mín hastarlega. Það var Alla móðuramma mín sem var flutt á sjúkrahús Selfoss á miðvikudagsmorguninn þaðan sem hún var send til Reykjavíkur. Þar komust læknar að því að það væri ekki um annað að ræða en akút uppskurð þá um kvöldið, hreinlega upp á líf og dauða. Amma er nefnilega búin að vera lungnasjúklingur í mörg ár og voru læknarnir ekki vissir um að lungun hennar mundu þola svæfingu og svoleiðis. Við biðum milli vonar og ótta yfir nóttina en sú gamla lét þetta ekkert á sig fá. Vaknaði bara eins og ekkert væri og spjallaði við hjúkrunarfólkið á gjörgæslunni! Þessi amma mín er 77 ára og er mamma hennar, sem er 99 ára enn lifandi og hress fyrir vestan.
Já ég segi ekki annað en að þegar þær voru búnar til þessar heiðurskonur þá voru hlutirnir gerðir með þeirri fyrirætlan að endast!!! Ég er svo stolt af því að vera komin af svona kjarnorkufólki :)

Svona í lokin þá bendi ég á nýjan link hérna til hliðar hjá mér, það er Dísa systir sem er tekin til við að blogga á fullu. Ég bendi sérstaklega á fullt af myndum af fallegu fjölskyldunni hennar :)

Góða helgi öll sömul...

p.s. Inda hlaupársbarn, innilega til hamingju með daginn:) Kem í kökuboð í kvöld...!

Þú ert það sem þú hugsar

2008-02-19T12:54:00.002Z

Námskeiðið um síðustu helgi var alveg frábært! Það hófst á föstudagskvöldið og var frá 8- 10:30 og var svo bæði laugardag og sunnudag frá kl. 9-5. Mikill tími sem í þetta fór en alveg þess virði.
Það er nefnilega svo merkilegt að þó maður telji sig með slatta af heilbrigðri skynsemi þá þarf allaf að segja manni sömu hlutina aftur og aftur. Ég ætla ekki að fara nákvæmlega í innihald námskeiðsins núna, kannski nenni ég því seinna, en læt nægja að segja það að ég hafði heilmikið gagn af því og ætla að nota mér nokkur góð atriði úr því. Ég á örugglega eftir að koma með punkt og punkt hérna inn öðru hvoru.
Mér finnst hreinlega að allir ættu að fara á þetta námskeið, verst að Guðjón er að fara að flytja til útlanda tímabundið svo það fer hver að verða síðastur.

Hér kemur einn viskupunktur: Settu þér markmið og stefndu að þeim, þú þarft alltaf að vera að stoppa og endurskoða stefnuna en ímyndaðu þér skip sem sett er í gang og siglt af stað á neinnar stefnu eða ákveðins áfangastaðar, hvar endar það?

Af heimilinu mínu er það að frétta að ég tók trylling á það á föstudaginn áður en ég fór á námskeiðið. Kláraði kannski ekki alveg að þrífa allt en fann t.d. herbergið mitt og baðherbergið ásamt stofu og eldhúsi. Hjúkk maður, var farin að halda að einhver hefði stolið þessum herbergjum og sett inn einhverjar ruslakompur í staðinn!! En nei nei, þetta var allt þarna og því miður Dóra, þá verð ég að segja að í tiltektinni kom í ljós að það var bara ég sjálf og mín afkvæmi sem höfðum sturtað okkar drasli út um allt, get ekki kennt neinum öðrum um. Og mikið erum við sammála um tilgang tiltektar og þrifa Ásdís!!! Þetta comment þitt var eins og talað úr mínum munni :)

Hund vantar nýtt heimili!
Já ég er byrjuð að svipast um eftir nýju heimili fyrir hann Depill. Þar sem við stefnum að því að flytja til Edinborgar í ágúst þá þarf hann hvort eð er að fá nýjan samastað svo ég ákvað að byrja bara snemma að leita. Og það er nú einhvern vegin þannig að eftir að ákvörðunin var tekin þá vill ég helst fá heimili fyrir hann sem fyrst. Það er eitthvað svo erfitt að horfa á hann og vita að maður er að fara að láta hann frá sér.
Ég setti auglýsingu inn á hvuttar.net og þar er góð lýsing á honum (þótt ég segi sjálf frá). Endilega hjálpið mér að finna handa honum gott heimili, látið þetta berast eða hafið mig í huga ef þið þekkið einhvern í sveit sem gæti hugsað sér að taka að sér fjörugan vinnuþjark. Hann er nefnilega ekkert alveg ómögulegur þó ég ráði illa við hann, hann þarf bara eiganda sem er ákveðinn og staðfastur, ergo = ekki eins og ég!!

Allt í drasli... og rusli

2008-02-15T09:55:00.002Z

Heimilið mitt er ekki þekkt fyrir einstaka snyrtimennsku eins og allir vita sem einhvern tíman hafa komið heim til mín. En við mæðgurnar þrífumst í sjálfu sér ágætlega í öllu draslinu. Samt kemur stundum að því að mér ofbýður gersamlega. Þá hef ég of lengi hummað fram af mér alls konar verk sem safnast svo saman í eina stóra ruslakompu sem telur alla íbúðina!!!
Núna er einmitt komið að þessum punkti þar sem minn eigin sóðaskapur (og kannski helst slóðaskapur) hefur farið út fyrir mín mörk. Lyktin í ísskápnum bendir til þess að eitthvað hafi skriðið þar inn og dáið, inni á pínu litla baðherberginu mínu eru tómir sjampóbrúsar og drasl sem gerir það að verkum að þessi eini fermeter af gólfplássi sem á að vera þarna hefur skroppið eitthvað saman, hundahárin á gólfinu eru farin að safnast saman út við veggina og eru líklega í þessum töluðu orðum að plotta upp einhverja hernaðaraðferð sem felur í sér valdatöku á heimilinu, dagblöð og ruslpóstur eru út um alla íbúð og gera sitt besta til að rata ekki í endurvinnslupokann sem þó stendur við hliðina á útihurðinni (þar sem þau koma öll inn sko..), sokkar og ýmislegt annað sem frelsað hefur verið úr kjaftinum á Depli er uppi á borðum og í hillum þar sem hann nær ekki til (voðalega smart hilluskraut), kattaspor eru út um allt eftir hlákuna undanfarið og svona mætti lengi telja! Að lokum þá mæli ég ekki með því að fólk stoppi of lengi í sömu sporum inni hjá mér því ég man ekki hvenær síðast var skúrað!!!

Já góðu vinir, þetta hljómar ekki vel. En líklega endar þetta eins og áður með því að ég tek til hendinni og læt moppu og tuskur þjóta, gaman - gaman!!

Annars verður helgin voða busy, mér var boðið á námskeið hjá Guðjóni Bergmann "þú ert það sem þú hugsar" held ég að það heiti. Hún Anna Margrét var svo yndisleg að bjóða mér með sér og ég hlakka bara voða mikið til. Ég er ekki í neinum vafa um að ég geti notað mér eitthvað af þessum fræðum :)

Jæja, ætla að vinna smá og fara svo heim með restina af vinnunni því ég er að afþýða frystiskápinn minn og langar ekkert til þess að koma að öllu á floti í geymslunni (sem er nota bene, case út af fyrir sig í draslumræðunni!).

Góða helgi öll sömul og hugsið til mín í leit minni að "decent" heimili :)

Uppfærsla

2008-02-08T11:45:00.000Z

Ég er búin að laga aðeins í linkunum hérna til hliðar. Breytti Díönu þannig að nú er linkurinn á síðuna sem hún er að nota og bætti svo Dóru stóru, Jónu og Margréti P á listann :)

Hagaðu þér eftir aldri kona góð!!

2008-02-07T11:26:00.001Z

Það er einmitt spurningin, er ásættanlegt fyrir konu sem nálgast óðfluga fertugt að skreppa norður í land að djamma og taka svo hressilega á því að hún kemst ekki aftur í vinnu fyrr en um miðjan dag á þriðjudegi??? Ja spyr sá sem ekki veit ;)

Eins og segir í síðustu færslu þá skrapp ég norður til Akureyrar um síðustu helgi og heimsótti Dísu og fjölskyldu ásamt því að fara á þorrablót Tíunnar á laugardagskvöldið. Blótið var skemmtilegt og fjörugt eins og við var að búast og eftir át og drykkju í Gamla Lundi var arkað í gegnum snjóinn á Vélsmiðjuna þar sem haldið var áfram fram eftir nóttu. Ég skreið svo upp í rúm í skúrnum hjá Dísu um kl. 4:30 (held ég alveg örugglega) um nóttina.
Það er skemmst frá því að segja að þegar ég vaknaði á sunnudaginn kom í ljós að ég hafði týnt heilsunni í einhverjum skaflinum og líklega fauk hún með snjónum á haf út því ekki lét hún sjá sig þann daginn! Eiríkur hafði samband við mig um tvöleitið og sagði að þeir væru að fara að leggja af stað suður en það var ekki möguleiki fyrir mig að ætla að sitja í bíl á hreyfingu í nokkra klukkutíma þegar áreynslan við að tala í símann varð mér næstum ofviða. Nú svo mátti ég líka ekki fara of langt frá klósettinu - !!!!
Það var því ekki um annað að ræða í stöðunni en að liggja í rúminu (á milli æluferða) fram að kvöldmat þegar ég skreiddist inn til Dísu og plantaði mér þar í sófann.

Mánudagurinn fór svo í það að reyna að redda mér fari suður og fékk ég loks far með flutningabíl. Hann komst ekki af stað fyrr en um kl. 20 um kvöldið og sökum veðurs og ófærðar var ég ekki komin heim til mín fyrr en um kl. 5 um morguninn á þriðjudaginn.

Já kæruleysið er engu líkt og ég get alveg sagt ykkur það að samviskubitið hefur verið hér á ferðinni vegna þessa. Núna er líka engar meiri háttar skemmtanir á dagskrá hjá mér. Það getur vel verið að ég kíki á aðalfund Sniglanna á laugardaginn og ef einhverjir ætla út þá um kvöldið verð ég sko pottþétt edrú og ekki úti fram undir morgun.

Helgin var samt skemmtileg fyrir norðan alveg þangað til ég vaknaði á sunnudaginn :) og takk takk kærlega fyrir mig stóra systir !!

Helgarfrí - taka tvö

2008-02-01T11:35:00.000Z

Ég ætla að gera aðra tilraun til að fara norður til Akureyrar um helgina. Ætlaði að hafa saumahelgi hjá Dísu um síðustu helgi þar sem mamma og Björk Búbbadóttir ætluðu að hitta okkur Hildi en sökum ófærðar og veðurs þá komumst við mæðgur ekkert út úr borginni. Mamma og Björk fóru hins vegar norður og áttu þar góða og afkastamikla helgi við upphlutssaum með Dísu.
Við Dagrún vorum búnar að ákveða að fara saman norður (nauðaði í henni svo ég þyrfti ekki að keyra alla leiðina ein) og Bryndís Ploder ætlaði með. Þegar hætt var við á síðasta föstudag þá var stefnan strax sett á næstu helgi sem nú er komið að. Dagrún tók að vísu forskot á helgina því hún fór norður með flutningabíl á þriðjudaginn og svo flaug Bryndís í gær. Ég sá því fram á að keyra ein þrátt fyrir allt saman þangað til Dagrún hringdi í gær og sagðist vera búin að finna far handa mér og að ég þyrfti ekkert að keyra, bara vera farþegi til tilbreytingar :) Ohh ég var svo ánægð, ég fæ s.s. far með Eika Diesel og Frikka Gamla.
Ástæðan fyrir þessum fjölda Snigla á norðurleið er þorrablót Tíunnar, vélhjólafélags norðuramts. Það er s.s. búið að breyta Productive þjóðbúningasaumahelgi í unproductive djammhelgi með hjólafélögum!!! hehehe.....!

Aðeins að öðru, þar er loksins búið að búa til mastersnámið sem ég ætla að fara í og ég er farin að undirbúa umsögnina. Hér er linkur á lýsingu á náminu fyrir þá sem eru jafn miklir nördar og ég og verða voða spenntir að lesa svona "boring stuff" eins og dætur mínar kalla þetta :)

Heyrumst eftir helgi þegar ég verð búin að knúsa frændsystkini mín í klessu og djamma með norðansniglum :)

Hver vill kaupa hús handa mér?

2008-01-23T12:51:00.000Z

Ég fann óvart akkurat rétta húsið fyrir mig á netinu. Núna vantar mig bara einhvern sem er til í að kaupa það fyrir mig!!! Ég fæ nefnilega út úr greiðslumati að ég geti ekki keypt neitt sem kostar meira en svona 7 millur eða með öðrum orðum þá hef ég engan vegin efni á því að borga þau 110 þús á mánuði í leigu eins og ég geri núna. Gat nú svosem alveg sagt mér það sjálf......

En arrrg... af hverju þurfti ég þá að rekast á fullkomið hús handa mér til sölu! :(

Vinnan göfgar og allt það...

2008-01-21T13:16:00.000Z

Ég hef ekki verið í neinu stuði til að blogga mikið undanfarið og gerir það bara ekkert til. Ég hef örugglega sagt það áður hérna að ég nota þetta svæði til þess að skrifa um það sem mig langar til í það og það skiptið og ef það er ekkert í einhvern tíma þá er það bara svoleiðis.

Nýliðin helgi var róleg. Fór aðeins í vinnuna á laugardaginn og var svo heima allan sunnudaginn að þvo þvott og sauma. Var fyrst núna að koma mér aftur af stað í upphluts- saumaskapnum. Sneið skyrtuna á Hildi og saumaði hana saman svo nú er "bara" frágangurinn á henni eftir. Mér sýnist hún m.a.s. ætla að passa á stelpuna!! Verð alltaf jafn hissa þegar það gerist þegar ég þarf sjálf, ein og óstudd, að sníða eitthvað...!

Það er best að reyna að halda aðeins áfram í þessum saumaskap í vikunni því planið er að fara norður til Dísu um næstu helgi þar sem mamma ætlar að koma líka, til að halda saumahelgi. Mamma er nefnilega að gera upphlutinn á hana Björk bróðurdóttur mína sem á líka að fermast.

En aftur að vinnunni, hérna er útsýnið frá skrifstofunni minni og þar fyrir neðan er mynd frá litlu skrifstofukompunni minni sem ég er svo ánægð með :)

Hvalfjörður - Glymur

2008-01-14T10:21:00.000Z

Við Hildur og Depill fórum í rosa góða gönguferð á laugardaginn. Fórum inn í Hvalfjörð og gengum upp að Glym. Við fórum að vísu einhverja skrítna leið, allt uppi í hlíðinni og þegar við vorum komnar töluvert hátt upp þá komumst við að því að líklega hefðum við þurft að vera hinum megin við gilið til þess að sjá fossinn! Við sáum þess vegna bara úðann frá honum í þetta sinn.

Útiveran var engu að síður alveg dásamleg og við komum þreyttar en endurnærðar á líkama og sál heim eftir þetta þriggja tíma labb :) Læt myndirnar tala sínu máli.

Lífið og tilveran

2008-01-08T10:06:00.000Z

Lífið er undarlegt svo ekki sé meira sagt.
Við förum öll í gegnum það á okkar hraða hvort sem okkur líkar það betur eða verr. Börnin vaxa úr grasi áður en maður veit af og ég sem er ekki búin að átta mig á því að ég sé orðin fullorðin á allt í einu hálf-fullorðið barn. Hvernig getur þetta hafa liðið svona fljótt og það án þess að ég hafi tekið eftir því?
Ég held alltaf að ég breytist ekki neitt og þ.a.l. fullorðnist ekkert heldur. Svo er ég bara allt í einu komin í hlutverkið sem mér fannst vera mömmu minnar! Úff já, þið sem eruð með ungabörn ykkur finnst örugglega langt þangað til þau verða fullorðin og sjálfstæð en vitið þið, það er nefnilega ekki svo langt...!

En aðeins að öðru...

Samskipti manna á milli taka oft ekki endilega mið af aldri og þeim þroska sem gert er ráð fyrir að fylgi hækkandi aldri. Til dæmis virðast samskipti kynjanna stundum ekkert hafa breyst frá því við vorum 15 og fram yfir fertugsaldurinn. Kannski er þetta með aldur og þroska bara míta sem á sér litla stoð í raunveruleikanum. Ég get svosem verið sammála því að reynslan kennir manni sem betur fer ýmislegt í gegnum árin og flestir virðast læra eitthvað af henni. En samt virðist það vera þannig að margir láta hjá líðast að rýna inn í sjálfan sig til þess að reynslan nýtist til aukins þroska. Oft enda því grunn-samskipti manna á milli í sandkassanum þar sem einfaldleikinn ræður ríkjum.

Ég kann vel við að vera einhleyp vegna þess sjálfstæðis sem það veitir mér. En ég hef samt gaman af samskiptum við hitt kynið og ætla mér ekki að falla í þá gryfju aftur að loka á allt svoleiðis vegna eins skemmds eplis. Það koma alltaf til með að vera fleiri skemmd epli í körfunni og í litlum eplakörfum er líklegt að hitta á þau oftar en einu sinni. Sum eplin hafa líka verið lengi í körfunni og eru skemmd að einhverjum hluta en það má þá alltaf njóta þeirra hluta sem eru djúsí og safaríkir og skilja hitt eftir. Þetta eru forréttindi sem ég sem óbundin manneskja get leyft mér. En á móti fæ ég ekki heldur neinn sem samþykkir mína skemmdu hluta í bili. Það er allt í lagi eins og er en ég vona samt að ég eigi einhverntíman eftir að njóta þess að vera í góðu og heilbrigðu sambandi við mann sem þarf ekki bara hækju heldur getur líka verið ein slík.

Gleðilegt nýtt ár!

2008-01-02T16:28:00.000Z

Ég er komin heim aftur eftir ferðalög hátíðanna og mikið er það nú gott. Því að þrátt fyrir að alltaf sé notalegt að heimsækja ættingja og vini og æðislegt að eiga með þeim góðar stundir þá er alltaf jafn gott að koma heim aftur.

Jólin á Ísafirði voru yndisleg og róleg. Ferðin vestur var hundleiðinleg, mikil hálka og tók endalaust langan tíma :( en stormurinn og snjókoman yfir jólin var dásamlegt því ekkert er eins notalegt eins og að sitja inni í gömlu timburhúsi, undir sæng með nóg að bíta og brenna og hlusta á vetrarveðrið úti :)

Ferðin suður var jafn leiðinleg og ferðin vestur, hálka og leiðindi.

Á milli hátíða gerðist ég sófakartafla í einn og hálfan sólarhring og fór svo til Dagrúnar í Þykkvabænum kvöldið fyrir gamlársdag. Hildur varð eftir hjá pabba sínum fyrir vestan og Ólöf, sem kom með mér suður, var með Rúti yfir áramótin.

Áramótin í Oddsparti voru bara hrein snilld! Fámennt en virkilega góðmennt :)

Gamlársdagur byrjaði með því að þeir sem mættir voru á svæðið drifu sig út að gera stóru kartöflugeymsluna klára fyrir veisluna. Það var skúrað og skrúbbað, bæði húsnæði og hjól, allt skreytt hátt og lágt, aftur bæði húsnæði og hjól og svo var tekið til við eldamennskuna.

Grillað hreindýr, meðlæti og alles mmmmm.... það verður ekki af henni Dagrúnu skafið að hún er meistarakokkur kellingin ;)

Áður en tekið var til við átið fórum við niður á sand þar sem reynt var að kveikja í brennu. Það tókst að hluta þrátt fyrir organdi rok og rigningu.

Það sem eftir var nætur var dansað, hlegið og drukkið og svo dansað og hlegið aðeins meira þangað til ég bara gat ekki meir!!! Þvílík gleði .....!

Ég ætla að skrifa smá annál um nýliðið ár og hugleiðingar um það næsta bráðum en þangað til þá þakka ég öllum fyrir árið 2007 og óska ykkur velfarnaðar á nýju ári !!

Að lokum þá langar mig að láta fylgja með smá visku gæludýranna sem ég stal af síðunni hennar Önnu Margrétar:

New Year Resolutions For Pets...
15. I will not eat other animals' poop.
14. I will not lick my human's face after eating animal poop.
13. I do not need to suddenly stand straight up when I'm lying under the coffee table.
12. My head does not belong in the refrigerator.
11. I will no longer be beholden to the sound of the can opener.
10. Cats: Circulate a petition that sleeping become a juried competition in major animal shows.
9. Come to understand that cats are from Venus; dogs are from Mars.
8. Take time from busy schedule to stop and smell the behinds.
7. Hamster: Don't let them figure out I'm just a rat on steroids, or they'll flush me!
6. Get a bite in on that freak who gives me that shot every year.
5. Grow opposable thumb; break into pantry; decide for MYSELF how much food is *too* much.
4. Cats: Use new living room sofa as scratching post.
3. January 1st: Kill the sock! Must kill the sock!January 2nd - December 31: Re-live victory over the sock.
2. The garbage collector is NOT stealing our stuff.
1. I will NOT chase the stick until I see it LEAVE THE IDIOT'S HAND

Jólablogg

2007-12-21T09:50:00.000Z

Við mæðgurnar héldum litlu jólin heima hjá okkur í gærkvöldi. Ég áttaði mig nefnilega á því að ég hafði ekki haldið jól á mínu heimili síðan árið 2000, ég fer alltaf vestur til mömmu. Ég er farin að sakna þess að hafa engin jól heima hjá mér svo við ákváðum að skreyta jólatréð, þrífa og baka og bjóða svo vinum okkar í smá jólaboð. Ég ákvað einnig að þar sem stelpurnar mínar eru nú orðnar svona stórar þá mundum við opna þá pakka sem komnir væru svo við þyrftum ekki að flytja þá með okkur vestur bara til þess að koma með allt saman suður aftur eftir nokkra daga.

Hildur bauð þremur vinkonum sínum, Ólöf bauð Rúti og tveimur vinkonum og ég bauð Dagrúnu og Einari en Jóna komst ekki.

Við Hildur skreyttum, þrifum og settum upp jóladúka í gærdag og svo var boðið upp á heitt súkkulaði, ístertu, smákökur og brauðrétt. Eftir mikið át opnuðum við pakka og spjölluðum saman. Dásamleg kvöldstund og ég skil ekkert í því að ég hafi ekki gert þetta áður :)

Ég gat m.a.s. boðið upp á nokkra Napoleonshatta sem hundurinn hafði ekki komið sinni löngu tungu á ;)

Nú er stefnan tekin á Ísafjörð um helgina og svo suður aftur milli hátíða.

Ég óska tryggum lesendum mínum (hehe hljómaði þetta ekki flott?) Gleðilegrar jólahátíðar og farið þið varlega í umferðinni, jólamatnum, skreytingunum, þrifunum og öllu öðru sem þið takið ykkur í hendur!!!

Raunir bakara

2007-12-19T11:19:00.000Z

Ég var voðalega dugleg á laugardaginn og bakaði 4 sortir af smákökum. Ein sortin heitir Napoleonshattar og er uppskriftin einföld en óttalegt "moj" að baka þá. Svo er uppskriftin voðalega lítil svo það fást aðeins um 20 kökur úr henni. Að þessu sögðu er augljóst að eftir talsverða fyrirhöfn við svo fáar kökur þá eru þær extra spari og alveg stranglega bannað að snerta þær fram að jólum.

Þetta var ég búin að segja dætrunum og að sjálfsögðu hlýða þær mömmu sinni ;) En það er ekki hægt að segja það sama um dýrin á heimilinu, því að þegar Ólöf kom heim einn daginn þá voru hattarnir fínu út um allt borð, þeim hafði verið raðað á bretti sem stillt var upp ofan á brauðvélinni úti í horni uppi á borði, s.s. þannig að hundurinn næði þeim ekki. Það var s.s. kötturinn Míó sem var að leika sér þarna og sturtaði herlegheitunum út um allt! Þar sem Ólöf vissi að mamma hennar yrði alveg æf yfir þessu þá raðaði hún höttunum varlega aftur á brettið og lagði það frá sér á annað borð. EN.... það vissi ég ekki þegar ég kom heim og hleypti hundinum út úr búrinu áður en ég skrapp á klósettið.....! Auðvitað fann hans fína nef þessar líka fínu smákökur með marsipanfyllingunni og gúlpaði í sig eins mörgum og hann gat áður en ég fattaði hvað um var að vera :( ARRRRGGGG...!!!

Hvar annars staðar en á mínu heimili er kökum bjargað frá köttum bara til þess að lenda þá í hundskjafti??? Já já ég veit hvað þið ætlið að segja, ég get bara sjálfri mér um kennt fyrir að vera með þennan dýragarð heima há mér og það er alveg rétt enda gargaði ég aðallega á sjálfa mig eftir að hafa reynt að kenna Ólöfu um ;)

Að lokum eitt skilti sem ég þarf að eignast og setja upp heima hjá mér:

Hér þarf engin orð :)

2007-12-11T16:45:00.000Z

smá getraun samt: Hvaða kvikmyndapersónu er Míó að leika og úr hvaða mynd?

18 ár

2007-12-10T14:39:00.000Z

Í dag eru 18 ár síðan frumburðurinn minn fæddist. Það var smágerð 12 marka stúlka sem var aðeins 50 cm á lengd og með stór blá augu. Hún hefur lengst um rétt rúman meter síðan (106 cm nákvæmlega!) og þroskast og dafnað afskaplega vel, að mati mömmunnar alla vega sem er að sjálfsögðu alveg hlutlaus í þessu máli ;)

Til hamingju með afmælið elsku Ólöf

og farðu varlega með fullorðinsréttindin sem þér voru fengin af yfirvöldum í dag!!

Kveðja frá mömmu sem er að rifna úr stolti !!!